USA aningaasarsiornikkut aatsaat taama ajornartorsiortigaaq
Tamanna immikkorluinnaq periuserineqartoq Præsident Buship ualigaa oqalugiarnermini oqaatigaa. Naalagaaffilli aningaasaqarnikkut oqaluttuarisaanermi aatsaat taama ajornartorsiortigaaq.
- Naalagaaffitsinni ajornartorsiortoqaleraangat naalakkersuinikkut illuatungeriit aaqqiissutissanik nassaarniaqatigiittareerput, maannalu tamanna pisariaqarluinnalerpoq, George Bush oqarpoq. USA-mi aningaasaqarniarnikkut ajornartorsiortoqavissornera ikiorsiiffiginiarlugu sapaatip akunnerata ataatsip ingerlanerinnaani pingajussaanik saqqummiinermini, George Buship iliuuseriniakkanut atatillugu inatsisissatut siunnersuutigineqartut tapersersorneqarnissaat kaammattuutigaa. Piaartumik iliuuseqartoqartariaqarnera inatsisartut nalunngilaat. Suliffeqarfissuimmi aningaasat kaaviiaartinneqarnerannut annertuumik sunniuteqartut piffissami kingullermi akiliisinnaajunnaartalernerisa tamanna takutippaat. Killilersorneqanngitsumillu niuersinnaatitaanermik akisussaaffimmillu tigusisinnaanermik nersorinnillutik inuiaqatigiit ingerlanneqarmata, suliffeqarfissuit akiliisinnaajunnaalersut aningaasarpassuit tupinnaannartumik amerlassusillit ikiorsiissutigineqartalerput, sulilu taamatut periuseqarnerup ingerlatinneqaannarnissaa ilimagineqarpoq. Inuit aningaasatigut annaasassaraluisa naalagaaffimmit qulakkeerneqarnissaat siunniunneqarpoq. Buship oqalugiarnermini assigiinngitsutigut ikiorsiiniarluni periusissat immikkuualuttortai ilanngullugit saqqummiutereerlugit oqaatigaa, iluarsaassiniarneq akileraartartut aningaasaaterpassuinit akilerneqartussaassasoq, taakkuali utertinneqarumaartut naqissuserlugu.
Ukiorpassuarni naalagaaffiit assigiinngitsut aningaasaqarniarnermikkut ajornartorsiuleraangata killilersorneqanngitsumik aningaasat kaaviiaartissinnaanerannut periutsit innarlernaveersaaqqullugit USA oqaaqqissaariniartarmat, aviisimi USA Today-imi USA-p nammineq ajornartorsiuleriarami killormorluinnaq iliuuseqarnera aningaasaqarnermik immikkut ilisimasallit isornartorsiorpaat.
George Buship parteeqataata, inatsisartunut ilaasortap, Jim Bunningip puffasimaarluni Bush illaruaatigalugu oqarpoq, Bush Venezuelap præsidentiatut, Hugo Chavezitut iliortoq, Chavezilli akileraartartut aningasaataat attornagit suliffeqarfissuarnik pinngitsaaliilluni tiguaaginnartarnera kisimi assigiinngissutaasoq.
