Isiginnaartitsisartunngorniap soraarummeerutaa tv-kkut toqqaannartumik unnugu aallakaatinneqassasoq
Nunatsinni TV-kkut isiginnaartartut unnugu immikkut illuinnartumik aallakaatitsisoqarnissaanut, tassa isiginnaartitsissusiap Anaanat A/S-ip aallakaatinneqarnissaa qilanaarutigisinnaavaat.
Nunatta isiginnaartitsinermik ilinniarfiata takutitsisoqarnissaa aaqqissuussaraa. Tamatumali saniatigut, isiginnaartitsisartutut ilinniartut ilaata, Pauline Paaliit Mølgaardip soraarummeerutigalugu isiginnaartitsissusiortuulluni.
Paaliit Mølgaard nipilersoqatigiinni Liima Inuini erinarsortartutut aamma ilisimaneqarpoq, Appigummi aallakaatitsisartutut aamma ilisimaneqarluni.
Paaliit Mølgaardip isiginnaartitsisartullu Kimmernaq Kjeldsenip quiasaarusiaq "Casa Matriz", kalaallisut Anaanat A/S-imik taaguutilik, isiginnaartitsissutigissavaat, isiginnaartitsinerlu KNR-TV-kkut toqqaannartumik unnugu nalunaaqutaq arfineq-pingasunut isiginnaarneqarsinnaassalluni.
"Casa Matriz" Siana Raznovichimit, Argentinami arnat sapiissuseqarnerpaamik quianarnerpaamillu isiginnaagassiortartut nuimanersaasa ilaannit allanneqarpoq.
Anaanat paniillu - ajunngitsut ajortullu
"Casa Matriz" isiginnaartitsissutip taaguutaata oqaatigisaatut anaanat paniillu pillugit oqaluttuaavoq. Paaliit Mølgaard isiginnaartitsissusiami paniuvoq, Kimmernaq Kjeldsenilu anaanaalluni.
Isiginnaartitsissusiaq nunatsinni siullermik 2012-imi takuteqqaarneqartumik Majbritt Bech ilitsersuisuuvoq. Isiginnaartitsissusiaq Anaanat A/S takuteqqaarneqarmat isiginnaartitsisartunit, Makka Kleistimit Else Danielsenimiillu inuttaaffigineqarpoq.
AAMMA ATUARUK Kalaallit-Nunaanni Isiginnaartitsisartunngorniarfik pisortartaarpoq
COVID-19-ip isiginnaariartoqarnissaanut periarfissat allanngortippai, taamaammat isiginnaartitsineq kulturilu toqqaannartumik isiginnaarneqarsinnaajunnaarlutik, taamaammat Isiginnaartitsinermik ilinniarfiup aaqqissuussinermi matumani KNR suleqatigaa.
Isiginnaagassiaq isiginnaartitsisarfimmit KNR-TV-kkut unnugu nalunaaqutaq 20.00 toqqaannartumik aallakaatinneqassaaq, nunatsinniillu tamarmit malinnaasoqarsinnaassalluni.
