Ursula Von der Leyen EU-kommissionimi siulittaasunngussangatinneqartoq

Socialdmokratip Italiameersup David Sassolip EU-parlamentimi siulittaasunngornissaa amerlanerussuteqartut taasissutigereeraallu, Ursula Von der Leyenip, konservatiiviusup, EU-kommissionimi siulittaasunngornissaa ilimanarsiartuinnarpoq. Von der Leyenip EU-parlamentimi sapaatip-akunneri marluk qaangiuppata akuersissutigineqarnissaa naatsorsuutigineqarpoq.

Ursula Von der Leyen, Tysklandimi illersornissamut 2013-imili ministeriuvoq, nakorsartut ilinniarsimalluni, Tysklandillu kansleriata Angela Merkelip kingoraartissaatut maannamut taaneqartarluni.

Ursula Von der Leyen EU-kommissionimi siulittaasunngussappat, arnani siullersaalluni EU-kommissionimi siulittaasunngussaaq.

EU-mi politikkikkut inissisimaffiit qaffasissut pingasut nutaanik aamma inuttalerneqartussatut innersuunneqarput.

Europæiske Rådimut siulittaasussatut innersuunneqartoq tassaavoq Belgiap 2011-mili ministeriunerunera, 43-nik ukiulik Charles Michel.

EU-p nunanut allanut tunngasunut nutaatut qullersassaatut innersuunneqartoq tassaavoq socialdemokrati Josep Borrell, Spaniameersoq. Taanna EU-parlamentimi 2004-mit 2007-ip tungaanut siulittaasuuvoq.

Frankrigimeersoq Christine Lagarde, konservatiiviusoq, Europap qitiusumik aningaaserivissuani siulittaasussatut innersuunneqarpoq. Taanna nunat siuarsagassat taarsigassarsiniartarfianni IMF-imi maanna pisortaavoq.