Uranitalinnik piiaannginnissamik politikki allanngortinniarpaa

Naalakkersuisooqatigiit aasaq Qoornumi ataatsimeeqatigiinnerminni uranitalinnik piiaannginnissaq politikkeriniarlugu isumaqatigiissutigaat.

Uranimit piiaannginnissamut politikkikkut oqariartuutigineqartup allanngortinnissaa misissortariaqartoq aningaasaqarnermut naalakkersuisoq oqarpoq.

Kalaallit Nunaat ukiumut 1 milliard koruuninik ukiut tamaasa sipaaruteqartassasoq, aningaasaqarnermut siunersuisooqatigiit nalunaarusiaminni nalilerpaat.

Aningaasaqarnermut naalakkersuisup Palle Christiansenip Kalaallit Nunaanni aningaasanik isaatitsisoqarnissaa siunertaraa, oqaatigalugulu Kalaallit Nunaanni aningaasanik isaatitsisoqassappat suliffissuarnik aallartitsisoqartariaqartoq, urannitalinnillu piiaanerup misissorneqartariaqarnera oqaatigalugu.

Naalakkersuisut Qoornumi isumaqatigiissutaat suli attanneqartoq, Palle Christiansenip naqissuserpaa.

- Milliardinik koruuninik Kalaallit Nunaata sipaaruteqartariaqarneranut oqariartuuteqartoqarnera pillugu isumaqarpunga piffissanngortoq ukiuni kingullerni 30-ni politikkikkut aalajangiiffigineqarsimasut misissornissaat. Kalaallit Nunaata ineriartornissaa anguniarlugu inatsisinik allannguisinnaanermik misissuineq aallartittariaqarpoq. Palle Christiansen oqarpoq.

Nunatsinnut pitsaanerpaaq anguniarlugu oqallittoqarnissaa naalakkersuisup ujartorpaa.

- Nunatsinni maannakkut inatsiseqarpoq ilaatigut periarfissaasinnaasunik atuiffiunngitsunik. Eqqarsaatigisariaqarparput taama ingerlaannassanerluta imaluunniit suliffissuarnik pilersitsiniassanerluta, taamatut aammaanitsigut nunanit allaniit tapiiffigineqarsinnaagatta, Palle Christiansen oqarpoq.

Akileraarnikkuinnaq millardit koruunit matussuserneqarsinnaannginnerat Palle Christiansenip erseqqissaatigaa.

- Politikkikkut Iliuuseqartoqartariaqarpoq aammalu amerlanerussuteqartunit tapersersornissaa anguniartariaqarluni. Arriippallaamik sulissutigineqassanngilaq, taamaassappat isummernerit akisuallaalissapput. Maani nunami imaappoq, arlaannik isumminngikkaangatta isumaqartartoq isummersimasugut, taamaasilluni ineriartornikkut iliuusissaagaluit uninngatiinnarneqartarlutik, Palle Christiansen oqarpoq.