Uranisiornermut akerliussutsimik Københavnimi takutitsilersut

Tallimanngorpat tulliani, juulip 31-ani, kalaallit Tivolimi ukiumoortumik kulturikkut pikialaartitsinerat nalerorlugu, kalaalerpassuit ullormi tassani Københavnimi katersuussimasut politikkikkut isummersoqataanissaminnut aamma periarfissaqassapput.
Allattoq Karsten Sommer
juulip 23-at 2015 10:52
Nutserisoq Simon Uldum -

Kalaallit danskillu suliniaqatigiiffii arlallit Nunatsinni uranisiornissamut akerliussutsimik takutitsiniarput - URANI NAAMIK qulequtaralugu.

Akerliussutsimik takutitsineq Rådhuspladsimi Regnbuepladsimi nal. 13 aallartissaaq Nytorvillu tungaanut nal. 13.30 missaani ingerlaaqatigiittoqassalluni.

Nytorvimi oqalugiartussat ilagaat Inuit Ataqatigiit tunuliaqutaralugit folketingimut ilaasortaq Aaja Chemnitz Larsen kiisalu danskit folketingimut ilaasortat Finn Sørensen Enhedslistenimeersoq aamma Rasmus Nordqvist Alternativetimeersoq.

 

Oqalugiartoqarlunilu aliikkusersuisoqassaaq

Aammattaaq NOAH-mit, Det Økologiske Rådimit, Greenpeacemit kiisalu innuttaasut uranisiornissamut akerliusut suleqatigiivinit oqalugiartoqassaaq.

Akerliussutsimik takutitsinissamik aaqqissuisoq Falke Thue Mikailsen avatangiisinik illersuiniaqatigiit NOAH-p urani pillugu suleqatigiissitaanik suleqateqartoq taama oqaluttuarpoq.

Aammattaaq nipilersortunik aliikkusersuisoqassaaq, ilaatigut qilaatersortunik nutaaliaanerusunillu. Ilaatigut erinarsortartoq Miké Thomsen peqataassaaq Rassi "Kaalissaq" Thygesenilu Karina Møller peqatigalugu meeqqanik aliikkusersuissalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq