Uranimut naaggaartut 12,5 milliard koruuninut qujaannarput
Tallimanngormat februaarip 12-ani Greenland Minerals and Energy nalunaarpoq, Narsap eqqaani Kuannersuarni 12,5 milliard koruunit atorlugit aatsitassanik piiaaniarlersaarluni.
Greenland Minerals and Energyp siulersuisuunerisa siulittaasuata, Lars-Emil Johansenip taamaaliulersaarneq ataasinngormat radioaviisimut uppernarsarpaa, taamaallaalli Naalakkersuisunut siulittaasoq Kuupik Kleist nalunaarfigisimallugu unnerluni.
Aningaasaqarnermut Naalakkersuisup Palle Christiansenip tupigaa Greenland Minerals and Energyp tusagassiuutit aqqutigalugit taamatut nalunaarnera.
Narsami Urani Naaggaarparap siulittaasuata, Kalistat Lundip, Palle Christiansen taperserpaa:
- Aningaasarpassuit neqitaralugit toqqaannaavissumik tusagassiutitigut nalunaarneq assut tupinnarpoq, nangipporlu:
- Aatsitassanik uranitalinnik piiaaneq Kalaallit Nunaanni inatsisitigut inerteqqutaavoq, tupinnarpoq Naalakkersuisut nalunaarfigeqqaarnagit Greenland Minerals and Energy pilersaalersimammat.
- Nalunngilarput aningaasat tappigersitsisinnaasut. Tamannalu siusinnerusukkut maani Kalaallit Nunaanni takusareerparput. Aningaasarpassuit atorlugit aallartitsiniartartut qanoq kingunerlutsitsisartut misigereerparput, eqqaaginnartigu Puisi A/S, kalaallit aningaasaataannik atuinikuupput inuiaqatigiinnut iluaqutaanngitsumik. Narsami uran naaggaarparami siulittaasoq Kalistat Lund naggasiivoq.