Uranimut akuersaanngilluinnarnerup atorunnaarsinneqarnissaa Inuusuttut Ataqatigiit unitseqquaat
IA-p inuusuttai isumaqarput innuttaasut Inatsisartullu apeqqummi avissaaqqasut, uranimullu akuersaanngilluinnaarneq atorunnaarsinneqarpat Inatsisartuni nunatsinnilu angerlarsimaffimmi avissaartuutsitsillunilu isumaqatigiinnginnermik pilersitsissasoq
-Inuusuuttut Ataqatigiit isumaqarputtaaq, uran pillugu apeqqummi demokratiimik ataqqinninngitsumik periuuseqartoqartoq. Naalakkersuisummi Siumut siuttuliullugu apeqqummi uani, soqutigisatik kisiisa tuaviorullugit aallussimavaat allallu allatut isumaqartut tusaajumanngivillugit. Tamanna demokratiimut suusupaginninnertut taasariaqarpoq, Inuusuttut Ataqatigiit tusagassiorfinnut nalunaaruteqarlutik taama allapput.
Inuusuttut Ataqatigiittaaq paaserusuppaat naalakkersuisuutitallit taakkununngalu tunuliaqutaasut, uran pillugu aaliangiiniarnermut suliniarneq qanoq isumaqarfigineraat. Apeqqutigineqarsinnaasummi ilagaat, Atassutikkut Danmarkimut qanilaartumik suleqateqartuarnissamik illersuisuujuartut, Nunatta Danmarkillu akornanni uran pillugu apeqqut aallaavigalugu avissaartuutilerneq peqataaffigiumaneraat?
