Uranimut akerliusut nunalerinerup siunissaa aarleqqutigaat
Kalistat Lund-ip kujataani inuussutissarsiutit pillugit oqallittarfimmit aatsitassarsiortoqalissagaluarpat ernumanartoqannginneranik oqariartuutigineqartut isumaqatiginngilai.
- Ukua misissuinerit qanorluunniit ingerlanneqaraluarpata, uagut isumaqatiginngilarput maani Narsap eqqaani Kuannersuarni inuiaqatigiinnut taamak qanitsigisumiittumi aammalu inuussutissarsiutit pingaarutillit ingerlaneqartut qiterisaanni taamaattumik aatsitassarsiortoqalissappat, Kalistat Lund taama oqarpoq.
Narsap eqqaani aatsitassarsiornissamut ernumassuteqaratik kujataani inuussutissarsiutillit oqattarfimmi oqariartuuteqarput. Risø-imiit DMU-iillu misissuinerit tatigineqarlutik. Ilissi Narsami Uranimut naaggaartut peqatigiiffianinngaaniit misissuinerit suli amigartiginerarpasi, suunuku?
- DMU-iminngaaneersup Gert Asmundip Narsami oqalugiartup tamatigut taasarpaa; ulloq manna tikillugu fluorimik ajornartorsiutissamut qaangiutaasinnaasumik maannamut ilisimannittoqanngitsoq, tassalu fluori annertoorujussuaq tappikaniippoq. Taamatut aatsitassarsiortoqalissappat seerilluni kuulluni sunniuteqalissagaluarpat qanoq aaqqinneqarnissaa ilisimaneqanngilaq.
Kujataani inuussutissarsiutillit ujartorpaat avatangiisit pillugit misissuisoqassasoq, ilissi tamanna isumaqatigaasiuk?
- Isumaqataavugut Nunatsinni ujaqqat assigiinngitsut sumiinnersut misissorneqassasut aammalu tamakku piiarneqalissappata kingunerineqarsinnaasut misissorneqassasut aamma isumaqatigaarput, Kalistat Lund oqarpoq.
Kujataani aatsitassarsiortoqassanngippat suut allat inuussutissarsiutitut periarfissaappat?
- Nunatta tamarmi pisariaqartippaa uumasuuteqarnikkut naatitaqarnikkullu periarfissagissaarfiusut atorluarneqarnissaat, taamaammat maannakkut Kujataa periarfissagissaarfiummat annertuumik inerisarfiunissaa pilersaarutaavoq. Taannarpiarluuna tassa aarlerigipput maani taama ittumik aatsitassarsiortoqalissappat pilersaarutaasut ingerlanneqarsinnaajunnaartussaammata, Kalistat Lund taama naggasiivoq.
Peqatigiiffimmi Narsami Urani Naaggaarparami siulittaasoq Kalistat Lund aamma oqarpoq Kuannersuit eqqaani aatsitassarsinnaanermik misissuineq pillugu oqallinneq aallunneqaraluartoq suli annertunerusariaqartoq.
