Uranimut akerliullutik ataatsimiinniarput

Aaqqissuussisut, Narsami peqatigiiffik Earth Charter, akerliulluni ataatsimiinnissamut qaaqqusisuupput, Kalaallit Nunaat tamakkerlugu kiisalu kommunini politikerit uranimik piiaasoqannginnissaanik kiminniarsarissallugit. Narsami Kuannersuarni uranimik piiaanissaq pillugu tusatsiakkat imaaginnavipput, tamannalu Earth Charterip toqqissisimanartinngilaa, uranimillu piiaasoqassagaluarpat tamatuma kingunerisassai pillugit sumulluunniit attuumassuteqanngitsumik tunuliaqutaqarluni paasissutissiisarnissaq ujartorpaat.

Uranimik piiaanissaq pillugu Inatsisartut tallimanngorpat oqallisissapput, Narsamilu innuttaasut isumaqarput, namminneq isumakuluuteqarnertik Inatsisartut kommuninilu politikerit ilumoorullugu tigunngikkaat.

Narsami innuttaasut qaammatip ataatsip matuma siorna ataatsimiitinneqarput, oqartussaasut paasissutissiinerusarnissaat tassani ujartorneqarluni, maannamulli sumilluunniit qisuariartoqannglaq.

Inatsisartunilu oqaluuserineqangajalermat Narsami innuttaasut paasissutissanik annertunerusumik paasitinneqarnissartik aammaarlutik qinnuteqaatigaat.

Ataatsimiinneq illumi A21-mi ualeru nalunaaqutaq tallimanut ingerlanneqassaaq.