Uranimik piiaanissaq pillugu akerliussutsimik takutsitsinissaq taamaatinneqarpoq

Pisoq pillugu aaqqissuussisut, Narsami peqatigiiffik Earth Charter, sinnerlugu Kalistat Lund ima oqarpoq. - Isummersoqatigiiffiniarlugu naapissamaarsimagaluarpugut, aamma uani pisariaqarmat innuttaasut isumaat erseqqissoq annisissallugu. >Kisianni tassa tusarlerneqarpusi, suminguna?< -Tassa ataatsimiiffissaagaluarput tassunga siunertamut tulluanngitsutut isigineqarsimammat piginnittuusuninngaanniit ataatsimiiffissaagaluarput tamatumunnga atoqquneqarsimanngimmat ataatsimiinnissaraluarput unitsikkallaripput. Tassannga Narsap Kommunea piginnittuuvoq. >Suna peqqutigivaat?< - Nalulluinnarpara, taanna itisilerlugu paasinngilara, kisianni tusatsiakkakka naapertorlugit tassunga naapertuutinngitsutut nalilerneqarsimavoq. >Ilissimi tassunga qanoq isummerpisi?< - Soorunami uanga isumaqatiginngikkaluarpara, kisianni periarfissaq sivikinnermik allatut ilioriarsinnaasimanngilagut, tassa aamma una allamut nuutseriaraluarutsigu innuttaasut tusarleriasaarsinnaannginnatsigit, takanani ataatsimiiffissaagaluatta silataani inuit aggertussaagaluit oqarfigiinnarniarpavut ullumikkut ataatsimiinnissaangaluaq unittoq. >Tallimanngornerup tungaanut suli ullut arlaqarput, ullut taakkua arlaannut atorluarniarpisigit?< - Tamanna suli eqqartunngilarput, taamaaratarsinnaavoq, minnerpaamik isumaqarpunga una arlaatigut allakkiaqarsinnaanissatsinnut piffissaq atussagipput, taavalu inatsisartut eqqartuinissaannut aammalu naalakkersuisunut inatsisartunut aammalu immaqa inatsisartunut taamatut isummatsinnik apuussisinnaanissarput pisariaqarpoq, taama oqarpoq, Narsami peqatigiiffik Earth Charter, sinnerlugu Kalistat Lund. Suleqatigiiffik Earth Charter Narsamiittoq ataatsimiinnissamut qaaqqusivoq, siunertaralugu Kalaallit Nunaat tamakkerlugu kiisalu kommunini politikerit uranimik piiaasoqannginnissaanik kiminniarsarissallugit. Narsami Kuannersuarni uranimik piiaanissaq pillugu tusatsiakkat imaaginnavimmata innuttaasut isumaat Earth Charterip tusarusussimavai. Borgmester Kiista P. Isaksen ualiartoq oqarpoq kulturikkut illup A-21-ip ulluinnarni ingerlanneqarnera nammineq akuliuffigineq ajoramiuk pisumut tunngatillugu oqaaseqarsinnaanani.