Assi: KNR

Urani pillugu paasisassarsiorneq: Angalanermit imaqarniliaq aasap kingorna saqqummiunneqassaaq

Inuussutissarsiornermut naalakkersuisup Vittus Qujaukitsup, Siumumeersup, aamma Kommune Kujallermi borgmesterip Jørgen Wæver Johansenip, Siumumeersup, Kommune Kujallermi politikerit urani pillugu Canadamut paasisassarsiornissamut qanittukkut qaaqquaat.

Inatsisartut aatsitassanut ataatsimiititaliaanni ilaasortap Juliane Henningsenip Inuit Ataqatigiinneersup § 37 naapertorlugu arlalinnik apeqquteqarluni Inatsisartut aatsitassanut ataatsimiititaliaata angalanissaq pillugu ilisimatinneqarsimannginnera paasiuminaatsippaa.

Apeqquteqaataanut akissummi atuarneqarsinnaavoq innuttaasut amerlasuut urani pillugu paasisassarsiorluni Canadamut angalanermit imaqarnilianik saqqummiussanillu takusaqarsinnaanissaat Naalakkersuisut pingaartikkaat.

- Taamaalillutimmi innuttaasut namminneq isummersinnaassapput, Qujaukitsoq akissuteqaatimini taama allappoq.

AAMMA ATUARUK Juliane: Urani pillugu paasisaqarnerorusuppugut

Inatsisartut aatsitassanut ataatsimiititaliaata saniatigut aamma tusagassiorfiit peqataatinneqanngillat. Tamannalu tusagassiorfimmi pisortap Poul Krarupip NGO-llu siulittaasuata Mikkel Myrupip isornartorsiorpaat, Naalakkersuisut isorinnittunut inissaqartitsinatik illuinnaasiortumik urani pillugu illuinnaasiortumik paasissutissiinerarlugit.

AAMMA ATUARUK Illuinnaasiortumik paasititsiniaasoqartarnera Krarupip eqqarsarnartoqartippaa

AAMMA ATUARUK Qujaukitsoq: Inissaaleqisoqarnera pissutaalluni tusagassiortunik peqataasoqanngilaq

Qujaukitsup akissuteqaatimini erseqqissarpaa paasisassarsiorlutik angalasut soqutigisaqaqatigiinnik uranimik piianissamik akerliusunik ataatsimeeqateqarsimanngitsut.

Inatsisartullu aatsitassanut ataatsimiititaliaannut tunngatillugu Qujaukitsoq nassuiaavoq nammineq naliliinini naapertorlugu angalaneq pineqartoq ilisimatitsinissamik pisussaaffiup iluaniinngilaq.

- Taamaassappammi ataatsimeeqattaarnerpassuit pillugit ilisimatitsissuteqartoqartariaqartassaaq, Qujaukitsoq taama allappoq.

Angalanermit nalunaarusiap saniatigut Nalaakkersuisut urani pillugu nalunaarusiamik aamma kingusinnerusukkut saqqummiussissamaarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat