Urani pillugu Aleqa Villy-lu isumaqatigiinngillat
Apeqqutillu tamatuma sammineqarnerani oqaloqatigiissutaanerpaanut ilaavoq, uranimik Nunatsinnit siunissami annissuisoqalissagaluarpat, sillimaniarnikkut tamanna qanoq ingerlaneqassanersoq.
- Apeqqutinik taamaattunik oqaloqatigiinnerni inatsisitigut tunngasut oqaloqatigiissutaagajupput, tamatumalu kingorna paaseqatigiinnermik kinguneqartarlutik. Maani oqaloqatigiinnerput aamma taamaappoq, suleqatigiinnerlu pitsaasoq ingerlaqqilluni, Villy Søvndal oqarpoq.
Naalakkersuisut siulittaasuata, Aleqa Hammondip isertuutinngilaa, Danmarkip Nunattalu akornanni oqaloqatigiinnerit annertuut ilaatigut isumaqatigiinnginnerit, urani pillugu maanna ingerlanneqarmata.
- Urani Nunatta inuussutissarsiutigisinnaaneraa imaluunniit inuussutissarsiutigisinnaannginneraa napeqatigiinnitsinni eqaartorneqanngilaq. Kisianniliuna urani pillugu apeqqutit, Danmarkip akisussaaffigisaata ataaniitillugit qanimut oqaloqatigiilluarnissaq siunertaralugu naapeqatgiittugut isumaqatigiissutigeriassallugit, Aleqa Hammond oqarpoq.
Villy Søvndalip isumaqatigiinngittoqarnera aamma isertuutinngilaa, oqarluni apeqqut uranimut tunngasoq toreersumik aaqqinneqartariaqartoq, inatsisilerituunik assigiinngitsunik sulisitsinani.
Nunanut allanut tunngasunut ministerip taama isumaqarnera illuatungilerlugulugooq, Namminersorlutik Oqartussat nalunaarusiaq, inatsisilerituunit suliarineqaqqammersoq saqqummiuteqqammerpaat, tassanilu allaaserineqarpoq, Nunatsinnit uranimik avammut tuniniaaneq Nunatta kisimi akisussaaffigigaa.
Tamanna pillugu Villy Søvndal ima oqarpoq.
- Tamanna pillugu illuatungeriit isummavut saqqummiuppavut, tassami tamanna pissusissamisoorpoq. Pingaarnerpaarli tassaavoq, uranimut apeqqutit pillugit ataatsimoorussilluta siunissarlu eqqarsaatigalugu suligatta. Tamannalu pillugu qanoq isummersimanerput kingusinnerusukkut saqqummiunneqarumaarpoq, Villy Søvndal oqarpoq.
Naalakkersuisut siulittaasuata, Aleqa Hammondip aamma oqaatigaa, isumaqatigiinnermik inerniliussaq piffissami qanittumi pinavianngitsoq, naggataatigullu oqaatigalugu Danmarkip urani pillugu isummersuutaat paasissallugit pingaaruteqartoq.
- Tamanna pitsaasutut isigaara. Taamaattumik Namminersornitta eqqunneqarnerani akisussaaffigilersimasagut, Naalagaaffeqatgiitilluta oqaloqatigiissutigisarnissaat pingaaruteqartutut isigigatsigu. Uangut kissaatigaarput apeqqutit suulluunniit nutaat uangut siunertavut, illuatungeriinnit oqaloqatigiissutigisarnissaat. Tamannami avaqqunneqarsinnaanngilaq pissusissamisoorlunilu, Naalakkersuisut siulittaasuat, Aleqa Hammond taama oqarpoq.
Villy Søvndalip tikeraarnerani, urani pillugu oqalloqatigiinnerup saniatigut oqaloqatigiissutaapput, Nunatta arfattassaasa amerlineqarsinnaanerannut tunngasut aamma Issittumi Siunnersuisoqatigiit pillugit apeqqutit.
