Uran pillugu allaaserinnittoqaqattaarpoq
Nittartagaq uraninfo.org politikikkut aningaasarsiornikkullu arlaannannulluunniit attaveqanngitsuusoq, maanna akuliuppoq, tunngaviusumillu isummiussamut allannguinissamut akerliusut atsiornerannik katersilerluni.
Aalajangernissaq politikerit kinguartissagaat suliniuteqartut isumaqarput. Aamma uranimik piianeq pillugu paasissutissanik kalaallisut qallunaatullu allattanik amerlanerusunik piumapput, soorluttaaq aatsitassarsiornermi isertitsissutaasinnaasut allat misissoqqugaat.
Suliniuteqartut uranimik piianeq pillugu nuna tamakkerlugu taasisitsisoqarnissaa kissaatigaat.
Taamaammat uraninfo-meersut atsiornernik sukkanerpaamik katersiniarput. Nittartagaq atsiorfigineqarsinnaasoq ima allassimavoq www.skrivunder.net/bevarnultolerancen
Atsiornerit katersorneqartut pingasunngorpat, tassa aqaguagu, Inatsisartunut tunniunneqariissapput. Tunniussinermi puujaasaq imermik Narsap eqqaani Napasup kuuaneersumik aamma tuniussisoqassaaq.
Imeq puujaasamiittoq arpattartumit tigummiarneqarluni Nuummmi mittarfimmiit Inatsisartut ataatsimiittarfiata tungaanut arpaliunneqassaaq, nunami aalajangiisartut eqqaasinniarlugit eqqarsaatigilluakkamik aalajangiissammata.
Atsiornernik katersinerup saniatigut Nuummi Ilisimatusarfimmi ilinniagaqartut innutaasut uran-mik piiaanermut isumaannik paasiniaappput.
Tamanna pivoq qarasaasiakkut nittartakkami uani www.surveymonkey.com/s/uraniumpublic. Innuttaasut isumaannik paasiniaaneq kalaallisut qallunaatullu ingerlanneqarpoq isummernermi kinaassuseq ilisaritinneqartariaqarani.
Innuttaasut isummernerannut akissutit sapaatip akunnerata uuma ingerlanerani Ilisimatusarfimmi ilinnniartunit katersorneqassapput, taakkua inatsisartut tunngaviusumik sisamanngorpat aalajangernerisa kingorna saqqumiunneqarnissaat naatsorsuutigineqarpoq.
