Uran pillugu aalajangiineq Kalaallit Nunaat pillugu oqaaseqartartunit ataqqineqarpoq

Kalaallit Nunaata uran pillugu aalajangiinerannut isorinninnerpaat tassaapput Enhedslisten, uranimillu piaasoqarniarnermut akeqqersimaartuarsimallutik:

- Taama aalajangiisoqarnera aliasuutigeqaara. Ukiummi 25-t ingerlanerini Naalagaaffeqatigiusugut tamarmiulluta uranip piiarneqanngilluinnarnissaa isumaqatigiissuteqartuarsimagatsigu, Enhedslistenip nunarput pillugu oqaaseqartartua Finn Sørensen oqarpoq.

Folketingimili partiit sinnerini ugguartoqarpallaanngilaq.

- Tamanna Kalaallit namminniivillutik aalajangigassarivaat. Tamanna ataqqilluinnarpara. Aamma allaanerusumik aalajangersimasuugaluarpata ataqqissagaluarpara. Tassami kalaallit namminneerlutik tamanna aalajangigassarimmassuk, Konservatiivit sinnerlugit nunarput pillugu oqaaseqartartuat, Per Stig Møller oqarpoq.

Aamma assingukannersumik Socialdemokratit isummiussaqarsimapput:

- Tamanna Kalaallit Nunaata aalajangigarivaat. Aamma siunissami susoqassanersoq Kalaallit namminneerlutik nalilersuiffigiumaarpaat, Socialdemokratit sinnerlugit Flemming Møller Mortensen oqarpoq.

Radikale Venstremeersorli Jeppe Mikkelsen ima oqaamiinnarpoq:

- Tamanna tusaatissatut tigussavarput.

Liberal Alliancelli nunatsinnit aalajangiussaq tapersersorpaloqaat:

- Kalaallit pisuussutiminnik atorluarniaanerat isumassarsiatsialaavoq, nunarput pillugu LA-p oqaaseqartartua Villum Christensen oqarpoq.

Aamma Venstre sinnerlugu nunarput pillugu folketingimi ataatsimiititaliami ilaasortaq, aatsitassallu pillugit siunnersuisoqatigiinni siornatigut siulittaasuusimasoq Kim Andersenip nunatta aalajangiinera paasisinnaalluarpaa:

- Kalaallit pisuussuterpassuarminik atorluaarusunnerat ajoqutissartaqanngilaq, Kim Andersen oqarpoq.

Dansk Folkepartiilli Naalakkersuisut ima mianersoqquai:

- Kalaallit Nunaata aatsitassarsiorniarnera aallarnisarluarniarpassuk – tamannalumi ajoriffissaqartinngilara – uran tunisassiassatsialaagaluarluni avammut tunisaqarnialernermi aalajangiisoqassatillugu Danmarkip naalakkersuisui avaqqunneqarsinnaanngitsut Kaallit eqqaamasariaqarpaat. Tamanna Kalaallit paasisinnaanngippassuk suliaq sivitsuuttooriaannaavoq: Saqitsaannermi eqqartuussivik aallarniutigineqariaannaavoq, immaqalu Eqqartuussiviit qullersaat Højesteret aqqusaaqqaartariaqassalluni. Tassa ukiut qulit aqqaneq-marlullu akornanni piffissaq ingerlariaannaassalluni. Dansk Folkepartiip nunarput pillugu oqaaseqartartua Søren Espersen taama mianersoqqusivoq.

SF-ermiulli Enhedslistenip saniatigut ernumassuteqartunut akuupput:

- Kalaallit aalajangiinerat tusaatissatut tiguarput, qanorlu ingerlariaqqittoqassanersoq malinnaaviginiarlutigu. Ernumaqaagulli Kalaallit Nunaatalu uranimik annissuilersinnaanera imaannaanngitsutut isigalutigu, SF-it sinnerlugit nunarput pillugu oqaaseqartartoq Jonas Dahl oqarpoq.

Nunatta uranimik piiaasinnaalernissaa tunngaviusumik ajoriffissaqartinnagu ministeriunerup Helle Thorning-Schmidtip siornatigulli oqaatigisareerpaa. Taamaakkaluartorli uranimik piaasoqalissappat avammullu tunisassiortoqalissappat periutsit aalajangersimalluinnartut Danmarkimit oqartussaaffigineqartut atuutilissasut, DR-imut naqissusersimallugu.

Danmarkip nunanut allanut tunngasunut ministeria napparsimanini pissutigalugu oqaaseqarsinnaanngikkallarpoq, taannali sinnerlugu Danmarkip niuernermut- Europamilu pissutsinut ministeriata, Nick Hækkerupip kalaallit pisuussutiminnik atorluaanialernerat tapersersornerarpaa. Uranimulli tunngatillugu Danmarkip Kalaallit Nunaatalu akunnerminni tamanna qanimut suleqatigiissutigisariaqaraat naqissuserluguttaaq.