Uran Oqallinnermi sammineqaqaaq

Naalakkersuisoqatigiit inuiaqatigiinnik avissaartuutsitsisut, Inatsisartuni partiit illuatungiliuttut ataasiaannaratik oqaatigisarpaat.

Uranimut naaggaarluinnarnerup atorunnaarsinneqarnerinnaataaluunniit inuiaqatigiinni avissaartuunnermik pilersitsisoq, Aqqaluaq B. Egede isumaqarpoq.

- Inuiaqatigiit oqallittarfiini, soorlu internetti aqqutigalugu Facebookkimi assortuunnersuarmik pilersitsisoqarpoq aatsitassarsiorneq pillugu. Urani pillugu, Aqqaluaq B. Egede oqarpoq.

Inuiaqatigiilli tamarmik naalakkersuisunut akerliliinngitsut, Aleqa Hammond erseqqissaavoq, inuiaqatigiit nukittuunik naalakkersuisoqartariaqartut aamma oqaatigalugu.

- Innuttaasut amerlaqisut, uagutsinnut tunuliaqqutsiisut, aaliangersinnaassuseqartunik sapiissuseqartumillu naalakkersuisoqartariaqarput, Aleqa Hammond oqarpoq.

Uranimut naaggaarluinnarnerup atorunnaarsinneqarnera tunngaviusumik aaliangerneruinnaasoq Naalakkersuisut siulittaasuata aamma ersersinniarpaa.

- Aatsitassarsiorluni qinnuteqarluni akuersissummik tunniussisoqanngilaq, Kuannersuit eqqarsaatigalugu imaluunniit uranimik akulimmik sumilluunniit aaliangertoqanngilaq. Qinnuteqaammik aaliangertoqassappat, aamma taama ittumik pisoqassappat, nalinginnaasumik allatulli tusarniaanerit, oqallinnerit, innuttaasunik ataatsimiisitsinerit, susassaqartunut tusarniaanerit aatsaat ingerlaqqaassapput. Uaniuna tunngaviusumik isummiinnartugut, Aleqa Hammond oqarpoq.

Uranimut naaggaarluinnarnerup atorunnaarsinneqarnera tunngaviusumik aalajangernerinnaanngitsoq,  Aqqaluaq B. Egede isumaqarpoq.

- Tunngaviusumik aaliangerneriinnaanngilaq. Nul-tolerance atorunnaarsinneqarnerata malitsigivaa aningaasaliisussat aningaasileerusulernerat taavalu aningaasaliinissamut aningaasaliisoqarpat aammalu piviusunngortitsiniartoqalerpat aningaasat taakku imaaliallaannarlugit utertitassaanngillat, taavalu aamma isumaqatigiissusiornikkut ingerlanneqartussaallutik, Inatsisartuni ilaasortaq, Aqqaluaq B. Egede Inuit Ataqatigiit oqarpoq.