Uran: Kalaallit Nunaat nammineerluni aalajangersinnaanngilaq
Naalagaaffiup suleqatigineqarnissaa, Aatsitassaqarnermut naalakkersuisup isumaqataaffigaa, kisianni Kalaallit Nunaata kisimiilluni uranimik piiaasinnaatitaaneq aalajangertariaqaraa aamma oqaatigaa.
- Uagut nunatsinniit isumaqarpugut aatsitassarsiornermi oqartussaaffik tamaat tigoreeripput. Misissueqqaarnissamut aamma aatsitassarsiornissamut qinnuteqartoqarpat piiaanissamut, akuersissutit suliarinissaat tamaat nunatsinninngaaniit oqartussaaffigivagut . Kisianni nunatta avataanut nioqqutissiornermi sillimaniarneq eqqarsaatigalugu Danmarkip akuliusimanissaa tassani isumaqatigiissutigivarput, Jens-Erik Kirkegaard oqarpoq.
Nalunaarusiaq Namminersorlutik Oqartussanit suliarineqartoq akerlianik inerniliivoq. Tassa nalunaarusiaq una danskit kalaallillu akornanni suliarineqartumi erserpoq, kalaallit namminneerlutik aalajangersinnaanngitsut. Uranimik piiaaneq illersornermut sillimaniarnermullu attuumassuteqarmat. Namminersorlutik Oqartussanit nalunaarusiaq sapaatip akunnerit pingasut matuma siorna saqqummiunneqartumi allaaserineqarpoq Kalaallit Nunaat nammineq aalajangersinnaasoq. Aatsitassarsiornermi Naalakkersuisoq isumaqarpoq Namminersorlutik Oqartussat nalunaarusiaat tatiginarnerusoq.
Nalunaarusiami allaaserineqartumi inerniliinerit arlallit aatsitassaqarnermut naalakkersuisup isumaqataaffiginngikkaluarlugit, erseqqissaatigaa nalunaarusiaq Danmarkimit Kalaallit Nunaaniillu suliarineqartumi arlallit sillimaniarneq eqqarsaatigalugu isumaqataaffigalugit.
- Nunatta avataanut nioqquteqarnissaa ajunngitsumillu atorneqartut qulakkeerneqarnissaa aamma sakkussanut atuinerusuttut pinngitsoortinniarlugit, sillimaniarneq eqqarsaatigalugu Danmarkip akuliunnissaa suleqatigiinnissarpullu isumaqatigiissutigaarput, Jens-Erik Kirkegaard oqarpoq.
Naalagaaffiup ajunngitsumik isumaqatigiissuteqarfigisinnaanissaa suleqatigiillutillu ingerlariaqqissinnaanissartik, Aatsitassaqarnermut Naalakkersuisup neriuutigaa.
Inatsisartuni ilaasortap Sara Olsvigip nalunaarutit assigiinngisut paatsuungassutigai, imminnut aporaannerarlugit. Apeqqutinillu nutaanik saqqummersitsilluni. Tassa Namminersorlutik Oqartussat nalunaarusiaanni allaqqammat Kalaallit Nunaat namminiiginnarluni EU-p nunat iluanni ulorianartunik aatsitassarsiortut isumaqatigiissutaanni nunarput nammineq ilaasortanngorsinnaasoq, danskit kalaallillu nalunaarusiaanni taamaanngilaq.
- Nalunaarummi allatut allaqqavoq. Tassani allaqqavoq nunarput namminiiginnarluni isumaqatigiissummut ilaasortanngorsinnaanngitsoq, aatsaat isumaqatigiisut aalajangersagaq tamaat allanngorteqqaarlugu Kalaallit Nunaat ilaasortanngorsinnaasoq. Taamaattumik Aatsitassaqarnermut Naalakkersuisup oqaatigisai tusagassiortunik katersuititsinermi eqqunngillat. Tamanna uanga eqqumiigisorujussuuaara, Sara Olsvig oqarpoq.
