Uran: Immikkut ilisimasallit suligasuartussat suli toqqarneqanngillat
Taamaammat inatsisartuni Siumut sinnerlugu inuussutissarsiornermut ataatsimiititaliami ilaasortaq Karl Lyberth ugguarpoq.
- Tupaallannartupilussuuvoq aamma pakatsinarpoq suleqatigiissitaq suli pilersinneqarsimanngimmat - inatsitartut tamatta isumaqatigiilluta Naalakkersuisut peqquagut piaartumik suleqatigiissitamik aallartitsissasut, apeqqut taanna pingaaruteqarujussuaq inatsisartut upernaamut ataatsimiinneranni sakkussanik peqarniassagatta, Karl Lyberth taama oqarpoq.
Aatsitassanut naalakkersuisoq, Ove Karl Berthelsen Radioavisimut ullumi oqarpoq, suleqatigiissitap suliassai annertummata suli ilaasortassaanik toqqaasoqanngitsoq.
Siumukkormiout 2009-mi siunnersuuteqarput, Kalaallit Nunaanni aatsitassap piaarneqarsinnaatitaasup suulluunniit uran-imik akua 0,1 procent-mut qaffasinnerpaaffeqalerneqassasoq.
Kisianni siunnersuuteqartut Naalakkersuisullu ataasiarlutik kissaateqarnerisigut, siunnersuut marloriarluni kinguartinneqarpoq, Inuussutissarsiornermullu Ataatsimiititaliamut innersuunneqarluni.
Taama aalajangiinissamut suli piffissanngunnginnerarlugu itigartitsisoqassasoq, Naalakkersuisut taamani inassuteqaraluarput.
- Sammisamut pingaaruteqarluinnartumut, aatsitassanut uranitalinnut tunngatillugu misissuinissamut piiaanissamullu innuttaasut isumasiorneqarnissaat pingaartipparput. Isummersuutit tamaasa tusarusuppavut aammalu sammisami itisilerinissamut piffissaqarluartariaqarpugut, Naalakkkersuisut ilaatigut taama tunngavilersuipput kissaatigalugulu paasisaqarluarsimaneq tunngavigalugu aalajangiisoqarnissanut piffissaqarluarnissartik.
Tassallu suleqatigiissitamik suligasuartussamik pilersitsisoqassasoq Inuussutissarsiornermut ataatsimiititaliaq inassuteqarpoq, Inatsisartut akuersissutigisaanik.
Suleqatigiissitalli suli inuttalerneqannginneranut apeqqutit sillimaniarnermut teknikimullu tunngasut suli naammassineqannginnerat Ove Karl Berthelsenip tunngavilersuutiga, oqarluni apeqqutit taakkununnga tunngasut Naalakkersuisut sapaatit akunnerata tullianni isummerfigissagaat. Taamaalereerpat suleqatigiissitaq aatsaat sulilissasoq, Ove Karl Berthelsen oqarpoq.
Suleqatigiissitalli suligasuartussat Inatsisartut upernaakkut ataatsimiinnissaasa tungaanut naammattumik piffissaqarnissaat, Karl Lyberthip qularutigaa.
-Naatsorsuutigisariaqarparput apeqqutinik pingaaruteqartorujussuarnik sammisaqarnissaat aamma inatsisartuni oqallinnitsinni sakkussatsinnik saqqummiussisussat naammattumik sulinissaminnut piffissaqarnavianngillat, Karl Lyberth oqarpoq.
Inatsisartut upernaakkut ataatsimiinnerat marsip arfineq pingajuani aallartissaaq, inatsisartunullu oqaluuserisassaat siunnersuutillu kingusinnerpaamik februaarip aallaqqaataani tunniunneqassallutik.
