Uran ataatsimiititaliamukassaaq “kiffaanngissuseq illersorniarlugu”
Uranimut attueqqusinngilluinnarnerup inatsisartuni ullumi siullermeerneqarnerani, naalakkersuisut uranimut politikkiat suli amerlanerussuteqarpaluppoq.
Aaliangiinissamut siunnersuut aatsitassat pillugit ataatsimiititaliaannut ingerlateqqinngissaat inatsisartut ualigaa aaliangerpaat.
Uranimut attueqqusinngilluinnarnermut siunnersuut, innuttaasut isumaannik akerleriiffioqisoq, ullumi inatsisartuni siullermeerneqarluni oqallissutigineqarpoq.
Aaliangiussassaq tunngaviusumik isummiussaannaasoq Aleqa Hammondip oqallinnermi erseqqissarpaa, "uranimut attueqqusinngilluinnarneq sulisaassutitut peersinneqareermat". Siumumi oqaaseqartartup Per Berthelsenip siulittaasuni isumaqatigaa.
- IA ataasiunngikkuni marlunnik immikkut misissuisinnaanermik akuersinikuugami, uani Narsami Kuannersuit eqqarsaatigalugu. Kisianni oqarlutik misissuineq imaanngitsoq arlaannik aallartitsinissamik akuersisugut, Per Berthelsen oqarpoq.
Tamannali Kuupik Kleistip isumaqatiginngilluinnarpaa.
- Ajuusaaraluarlunga oqaatigissariaqarpara massakkut eqqunngitsumik oqaluttoqartoq. Naalakkersuisut siulittaasuat oqarpoq Kuannersuarnigooq uranisiornissamut akuersissuteqartoqareersimasoq. Taanna eqqunngilluinnarpoq, Kuupik Kleist oqarpoq.
Naalakkersuisoqatigiinni ilaasortat pingasut uissuumminartumik akerliupput.
Randi Broberg Partii Inuninngaanniit napparsimagaluarluni facebookkikkut nalunaarpoq uranimut akerliuluni, taasisitsisoqarnissaalu piumasarillugu. Allappoq aamma nalunngikkaluarlugu taamaaliornikkut partiini akerlilertussaallugu.
Kisianni Siumumi isumaqatigiinngittoqartoq naggataatigut erserpoq.
Kristian Jeremiassen parteeqatini assigalugit isumaqarpoq, uranimut naaggaarluinnarneq taamaatinneqartariqartoq. Parteqatinili assiginagit isumaqarpoq, apeqqut ataatsimiititaliami suliarineqartariaqartoq.
- Suliaq annertoorujussuuvoq, taamaattumik aamma ataatsimut periarfissaqarluta tamattalu inissaqarluta ataatsimiitsitaliami oqariartorsinnaaneq pingaartorujussuartut isigaara. Ukiuni kingullerni illua tungiliuuttuugatta ilungersortarsimaqaagut, annertuumik periarfissaqarusulluta. Aamma taanna massakkut illua tungitsinnut periarfissaqartariaqartoq uanga isumaqarfigivara, Kristian Jeremiassen oqarpoq.
Parteeqataa, naalakkersuisut siuulittaasorisimasaat Hans Enoksen tamatumunnga tapersiilertorpoq:
- Kiffaanngissuseq illersugassarivarput. Tamatta oqartussaaqataanerat ataqqineqartariaqarpoq. Pingaartumik suliassani taama ittuni taama ilungersunartigisumik, inuiaqatigiinni avissaartitsiffiusumi. Tassa misigisimavunga uanga affaata affaani immikkoortut sakkortuumik aporaapput. Taanna isertorneqarsinnaanngilaq. Taamaammat illua tungiliuttut piumasaqarnerat ataatsimiititaliami suliarineqassasoq tamakkiisumik illersorlugu taasissaanga, Hans Enoksen oqarpoq.
