Uran akuereqquneqalerpoq

Nunanit tamalaaneersut nunatsinni uraneqarneranik misissuerusullutik saaffiginnittartut itigartiinnarnagit, maanna Aatsitassat pillugit Naalakkersuisup Jørgen Wæver Johansen-ip kissaatigilerpaa, nunatsinni uranisiortoqarsinnaaneranik nutaamik nalilersueqqissaarnissat.

-Tassa nalilersortariaqarparput uagut inuiaqatigiittut uranomik aatsitassarsiorneq, taanna massakkut itigartittagarput, siunissami taamaaginnassanersoq. Imaluunniit aatsitassaq taanna aamma nukissiornermi nunani allani iluaqutigineqartoq aammalu nunat nalinginnaasunik suleqatigisartakkatta, soorlu Svenskit Finlandermiullu aamma aatsitassarsiornerminni aamma atortagaat, iluaqutigalugu aamma nunatsinni, sooq aningaasarsiornikkut sooq ineriartortitsineq ingerlatissannginneripput.

Jørgen Wæver Johansen aperineqarpoq maannakkut oqarnera ima paasineqassanersoq, politikkikkut oqartussaaqataasut sunnerniarneqalersut uranisiornissamik akuersaaqqullugit, nunarpummi uranimut naaggaartuarsimammat atomi atorlugu qaartartorsualiornermut atorneqartarnera akerleralugu, akivoq:

-Tassa isumaqarpunga, piffissaq oqaluttuarisaanermi siornatigut killiffiunikoq taanna qaangiutereersoq. Massakkut uranimik atuinermi aamma nunani avannarlerni suleqatigisartakkatta atuinerat nukissiornermut sammitinneqartartoq, qaartartorsuarnut sammitinneqarneq ajorpoq. Taamaammat uanga isumaqarpunga pissusissamisoortoq nunatsinni ilumut siunissami aamma aatsitassaatitta taassuma atorneqarnissaanut naaggaaginnassanersugut taanna nalilersussagipput. Taamaammat soorunami naalakkersuinikkut suliaqartartut nalilersuinerminni tunngavigisinnaassaannik suliaqarnissaq taanna massakkut nalilersorparput qanoq ingerlatissanerlugu.

Aatsitassat pillugit Siunnersuisoqatigiit, danskit naalakkersuinikkut sinniisuinit Inatsisartunilu ilaasortanit ilaasortaaffigineqartoq aalajangivinnginnermi nalilersueqqaassaaq.