Uraanimut naaggaarluinnarnerup atorunnaarsinneqarnera allanngortinneqarnavianngilaq
Nalunaarusiap Kalaallit Nunaannut iluaqutaasinnaaqqullugup saqqummiunneqarneranut atatillugu Københavnimi tamanut ammasumik ataatsimiititsinermi, siornatigut Naalakkersuisut siulittaasorisimasaat oqallinnermi tamanna pillugu aperineqarpoq.
- Piviusumik isumaliutigissagaanni naaggaarluinnarnermik aalajangernerup utertinneqarnissaa ajornarluinnarsinnaavoq. Naaggaarluinnarneq eqquteqqissagaluarutsigu akisoorujussuusinnaavoq aserorsaataasinnaallunilu, Kuupik V. Kleist Sermitsiami taama issuarneqarpoq.
- Tamatumali tungaanut piffissap ineriartornerullu qanorpiaq ingerlanissaat apeqqutaavoq. Aammami aatsitassanut atugassarisatigut politikkikkut isumaqatigiinngissutaasinnaasutigut ajornartorsiutinut inuiaqatigiit illersorneqarnissaat eqqarsaatigisassaavoq, taanna oqarpoq.
Aviisilli oqallinnermik paasinninnera Kuupik V. Kleistip Sermitsiap nittartagaanut ajuusaarutigaa. Oqaatsini uppernarsartinneqarsimanngimmata, oqallinnerullu kingorna Sermitsiami aviisiliortumit oqaloqatigineqannginnini, taassuma puffaammissutigaa.
- Oqaluuserineqartoq pingaaruteqartorujussuuvoq, taamaattumillu mianersuullugu suliassaalluni, Kuupik V. Kleist oqarpoq.
IA naalakkersuisuutitaqaleqqissagaluarpat partii uraanimut suli akuersaanngilluinnartuussasoq, taassuma neriorsuutigaa.
- IA-mit nunatsinni uran pillugu paasisitsiniaasoqassasoq piumasarinikuuarput aamma uranitalinnik piiaasoqalinnginnerani inuiaqatigiit taasitinneqaqqaarnissaat aamma piumasarinikuuarput, Kuupik V. Kleist Sermitsiap nittartagaanut oqarpoq.
