- Nittartagaq Inuit.dk qanoq iliuuseqarfigisinnaanngikkallarparput, nittartakkamik ingerlatsisoq Danmarkimi najugaqanngimmat.
Københavnimi politiini kriminalinspektøri Hasse Jakobsen, nittartakkap Inuit.dk-p matuneqarsinnaannginnera pillugu radioaviisimut taama tunngavilersuivoq.
Nittartakkami taaneqartumi ilaatigut kigutilissuup kigutaanik tupilaliat tuniniarneqartarput. Tamanna nunat tamalaat akornanni isumaqatigiissummut CITES-imik taaneqartartumik unioqqutitsineruvoq.
- Tamanna akuersaaruminanngilaq. Danmarkip nunat tamalaat akornanni akisussaaffini paasisariaqarpaa, avatangiisinik illersuiniaqatigiiffiup UPPIK-up siulittaasua Jens Peter Lange oqarpoq.
Avatangiisinik ministeriaqarfiup ataani immikkoortortaqarfiup Skov og Naturstyrelsenip 2003-mi upernaagaa Inuit.dk politiinut suliassanngorlugu tunniuppaa.