Uppik nunat tamalaat sulinerannut akoorusuppoq

Pinngortitamik illersuniaqatigiiffik Uppik nunat tamalaat uumasut pillugit ataatsimiittartoqatigiiffissuini marlunni alaatsinaatsutut inissaqalerniarluni qinnuteqarpoq. Nunat tamalaat suleqatigiineranni nunatsinniit pisortanut attuumassuteqanngitsunik akuusoqartariaqartoq, Uppiup siulittaasua Jens Peter Lange isumaqarpoq. Suleqatigiiffissuit pineqartut tassaapput CITES aamma Arfanniarneq pillugu Ataatsimiititaliaq.

- Alaatsinaatsutut ilaasortanngornitsigut nunatsinni oqartussanut uumasunillu piniagaqartunut piumasaqartuarnissarput qulakkeersinnaavarput, qaammasaanermilu suliassaqassaagut, Jens Peter Lange oqarpoq.

Jens Peter Lange Uppillu nunat tamalaat sulineranni toqqaannartumik akoorusupput, Namminersornerullutik Oqartussaniit paasissutissinneqartarneq kisiat isumalluutiginagu. CITES-imi uumasunik naasunillu niuerneq nunat 167-it sinniisuinit nakkutigineqarpoq, Arfanniarnernerlu pilllugu Ataatsimiititaliami nunat 59-it aalajangersuisarput kikkut angisuunik arfanniarsinnaanersut, arferillu qassit pisarineqarsinnaanersut.

Suliniaqatigiiffik massakkut aningaasanik pissarsiorpoq Arfanniarneq pillugu Ataatsimiititaliap Koreami aasaru ataatsimiinnissaannut peqataanissaminut akissaminik. CITES 2007-imi Hollandimi ataatsimiissaaq.