Qulaarpaa Uppernarsaatit: Akisunermi angalanerit, nerinerit unnuakkullu barimiinnerit

Aleqa Hammondip Namminersorlutik Oqartussat aningaasaataannik atornerluisimanera pillugu pappilissat allattugaatit assilinerisa qulaarpaat. Eqqartorneqartut pingaarnersiorneqarneri uani takusinnaavatit:
oktobarip 09-at 2014 08:49

Aleqa Hammondip Namminersorlutik Oqartussat aningaasaataannik atornerluisimanera pillugu pappilissat allattugaatit assilineri KNR-ip qinnutigereerlugit tigoqqammerpai, pappilissat taakku Kukkunersiuinermut Ataatsimiititaliap isornartutut nalilersimavai. Uppernarsaatini takuneqarsinnaavoq sulinermut atatillugu angalanerit sulisuunngitsullu angalasimanerat akuliussuunneqarsimasut. Uppernarsaatilli taakku akornanni ”ilaqutariinnut” Namminersorlutik Oqartussat akiligaannik kr. 35.455-inik nalilinnik aamma billetsisiniunneqarsimapput.

 

Angalatitsiviup Vejle Rejserip Nanoq-Classimut, tassalu akisunermut billetsinik pingasunik sanasimavoq, taakku Nuumminngaannit, Kangerlussuaq aqqusaarlugu Københavnimut uterlugulu angalanernut tunngasuupput. 15.april 2013 aallarsimapput 18.april 2013-ilu utersimallutik.  Angalanerit taakku Namminersorlutik Oqartussat akilersimavaat. Naalakkersuisut Siulittaasoqarfiata Naalakkersuisoqarfia Aleqa Hammondimut akileeqqusissummik allagaqarpoq, akiligassallu kingusinnerpaamik 11.juni 2013 akileqquneqarput.

 

Aamma atuarneqarsinnaavoq Aningaasaqarnermut Naalakkersuisoqarfik Aleqa Hammondimut akiligassamik eqqaasitsissuteqarsimasoq, tamannalu pivoq 26.juni 2013, akiligassat ullut 14-it qaangiutsinnagit akileqquneqarput.

 

24.september 2013 aamma 23.december 2013 akiligassat eqqaasitsissutigineqaqqipput. 28.maj 2014 akiligassat nalingi katillugit kr. 106.363-inngorsimapput, taakkulu akornanniipput  kr. 35.455-it suli akilerneqarsimanngitsut.

 

Taakkuinnaanngillalli. Naalakkersuisut Siulittaasoqarfiata Naalakkersuisoqarfia december 2013-imi Aleqa Hammondimut akileeqqutissummik nutaamik kr. 1514-inik nalilimmik allagaqarpoq, taakku 12.juni 2013-imit 15.juni 2013-mut Hotel Arcticimiissimanermut tunngapput. Akiligassaq kingusinnerpaamik 14. januar 2014 akileqquneqarpoq. Internetimik atuinermut, nerisassanut, mamakujuttunut, sodavandinut, naatsiiat panertunut, immiaaqqanut viinninullu atuinerupput. Akiliutaasimasut allagartaanni takuneqarsinnaavoq Hotel Arcticip bariani allaat unnuakkut pisisoqarsimasoq.

 

Taakkorpiaat marluk Kukkunersiuinermut Ataatsimiititaliap Aleqa Hammondimut allakkaminni taaneqarsimapput.

 

Kukkunersiuisut Deloitte nammineq pigisassanik isertuulluinnagassaasunillu Kukkunersiuinermut Ataatsimiititaliamut allakkaminni erseqqissaapput Namminersorlutik Oqartussat Naatsorsuutinut Allattuiffiat naapertorlugu sulinermut atanngitsumik billetsisiniaraanni akiligassartaa aallartinnani akilerneqartassasoq. Deloitte matumani naliliivoq malittarisassat malinneqarsimanngitsut.

 

Sulinermut atanngitsumik angalasimanerit, Hans Egedep Illuata sulinermut atanngitsumik kr.10.705-inik nalinganut attartorsimanera kiisalu neriniartarfimmi minibar-imillu atuisimanera pillugu Aleqa Hammond nassuiaateqassasoq Kukkunersiuinermut Ataatsimiititaliap kissaatigaa. Suliaq ilungersunarluinnartutut isornartoqartutullu Kukkunersiuinermut Ataatsimiititaliap nalilerpaa.

 

Aleqa Hammond akissuteqarluni allappoq sulinerminut atatillugu angalanermini ilaquttani angalaqatiginiassagamigit Naalakkersuisut Siulittaasuata Naalakkersuisoqarfia angalanissanik inniminniisuusimasoq. Angalaqataasussalli tamarmik ilaasimanngimmata billetsit kukkuneqarsimasut nassuiaavoq. Taamaattumik angalatitsivik akiligassiissummik nutaamik nassiusseqqullugu qinnuigineqarsimavoq. Aamma allappoq Naalakkersuisut Siulittaasoqarfiata Naalakkersuisoqarfianut qaammatikkaartumik kr. 5.000-ikkaartunik akilersuisalersimalluni. Nassuerutigaali ilaquttanik angalaqateqarnissamut billetsisiniarnermi malittarisassat atuuttut maluginiarluarsimanagit iliuuserisimasanilu ajuusaarutigalugit.

 

Kukkunersiuinermut Ataatsimiititaliap suliaq ilungersunarluinnartutut nalilerpaa, Naalakkersuisut Siulittaasuatalu malittarisassat atuuttut maluginiarluarsimaagit oqarnera allamut sangutitsiniarnerusoq pisimasullu pillugit utoqqatsissutitut atorneqarsinnaanngitsoq. Ataatsimiititaliaq isumaqarpoq Nunatta Karsiata inuinnarnit taarsigassarsiniartarfittut atorneqarsinnaannginnera Naalakkersuisut Siulittaasuata tupaallaatigisariaqanngikkaluaraa.

 

Aleqa Hammondip Namminersorlutik Oqartussanut akiligassaqarsimanera pillugu Inatsisartut ilisimatinneqassasut Kukkunersiuinermut Ataatsimiititaliap 26.september aalajangerpaa.