Uppernarsaatissaqanngilaq

Jonathan Motzfeldt, Kalaallit Nunaanni politimesterip aalajangerpaa arnamik kannguttaalliorfiginnittoqarsimasinnaaneranut suliaq matuniarlugu. Qanoq aalajangiineq isumaqarfigaajuk?

Uani apeqqummi pineqartumi suliaq taama peqqissaartigisumik maannakkut nalunaarutigineqarmat tunngavissaqangitsoq.

Illit pineqartumut tunngatillugu eqqartuussisutigut ingerlatitseqqissamaarpit?

Taanna siulliullugu eqqarsaatiginngilara, eqqarsaatiga pingaarnerpaaq apeqqut una taama tujorminartigisoq piaartumik inuunermi ingerlavinnit peerpat taanna kissaatiginerpaavara, maannakkullu peerpoq, aamma uterfigeqqikkusunngilluinnarpara uanga. Uagut avatangiisitsinninngaanniit inunnit inoqatitsinnit eqqartuunneqarnivut sakkortoorujussuarmik aallartereertarput suli nalullugu pissutsit qanorpiaq issimanersut. Tassa taanna una suliaq taama ittumik ilinniarfissaasutut isumaqarfigaara avatangiisitsinnit tamanit.

Tusagassiuutitigut saqqummiunneqartarsimapput assigiinngitsorpassuit. Tusagassiuinermut tunngasuni aalajangiisartunut, Pressenævnimut, maalaaruteqassamaarpit?

Taanna suli tikillugu eqqarsaatiginngilara, ullumikkut pisimasut, nalunaaquttap akunneri kingulliit qaangiuppata soorunami uanga nammineq, eqqartuussisora, sulisora nammineq oqaloqatigeqqaarlugu aamma tamakkua tikissavagut. Kisianni oqareerpunga uanga tungininngaannit una apeqqut nerriviup qaaninngaannit maannakkut peerneqarnera, taanna pingaarnerpaavoq.

Tassa imaassinnaavoq pressenævnimut maalaaruteqaartutit?

Taama oqassanngilanga maannakkut. Kisianni nalungilara pressenævneqartoq, taamaattumik pisariaqassappat tamakkua tikinneqassappata aamma assortornianngilara.

Arnap unnerluutiginnikkaluartup politiit suliamik unitsitsinerat assut tupaallaatigisimanerarpaa, maannakkullu oqaaseqarusunngikkallarluni.