Upperisarsiortut siuttui tikilerput

Nunarsuatsinni upperisarsiornermi siuttut ullumikkut nunatsinnut tikissapput, silap allanngoriartornera avatangiisillu pillugit ataatsimeersuarnermi aqagu aallartittussami peqataajartorlutik. Ataatsimeersuarnermut taaguutigitinneqarpoq ‘Issittoq – inuunerup tarrarsorfia’.

Upperisarsiortunit assigiinngitsunit siuttut – ilaatigut tassaasut kristumiut, muslimit, juutit, buddasiortut, hindut upperisaannik upperisarsiortut, sikh-erit kiisalu Inuit Saamillu – Ilulissat kangerluanni Sermeq Kujallermi, sukkasuumik aakkiartortumi, nipaatsumik qinoqatigiinniarput. Sermersuup aakkiartornerata ajornartorsiutaanerata oqallisiginissaata saniatigut Amerikamiut atomimik qaartartuliaat Avanersuarmi immamut nakkarnikut oqaluuserineqassapput, tassami ullumikkut akuutissat arrortikkuminaatsut pissutigalugit niviarsiaqqat nukappiaqqanit amerlanerusut inunngortalermata.

Ataatsimeersuarnermut illersuisuupput Bartholomew siulleq Konstantinopelimeersoq – ilagiit ortodoksit qullersaat – kiisalu EU-kommissionip siulittaasua José Manuel Barroso aamma Kofi Annan – siusinnerusukkut FN –imi qullersaasoq.

Ataatsimeersuarneq upperisarsioqatigiit kattuffiannit RSE-mit aaqqissuunneqarpoq. Ataatsimeersuarneq upperisarsiornermik avatangiisinillu sammisaqarfiusoq RSE-p aaqqissuussaasa arfineq aappassaraat.

Pave Benedict 16-ata ippassaq sapaatip akunneranut ataasiarluni tamanut saqqummertarnerminut atatillugu nunatsinni ataatsimeeqatigiittussat inuulluaqqussuteqarfigai tapersersuinissaminillu neriorsuilluni.

- Imermit isumalluutivut paareqqissaartariaqarpavut, aamma silap pissusaata allanngoriartornera inuiannut tamanut pingaaruteqarluinnarmat eqqaamasariaqarparput, pave oqarpoq ilanngullugulu oqaatigalugu avatangiisinik illersuineq tassaasoq:

- Guutip pinngortitaanut ataqqinninneq.