Upperisarsiortut nunatta Kitaani ataatsimeersuassapput

Nunarsuarmioqatigiit qaammatit pingasut qaangiuppata naapinneranni nunarput kingumut qitiussaaq, upperisarsioqatigiit assigiinngitsut aallartitaat, nunatsinni sinersuutigalutik tamatumuna ataatsimeersuassammata.

Ataatsimeersuartut ukiormanna qulequtarissavaat: Issittoq: Inuunerup tarrarsuutaa. Naapinnerallu septembarip ulluisa arfernanniit 13-iannut pissaaq.

Ilulissanut apuukkunik takornariartaammut M/S FRAM-imut ikissapput. Angalanertillu aallartillugu Ilulissat kangiani nunarsuaq pillugu qinoqatigiissapput.

Kujammut Narsaq tikillugu angalaarnerminni pilersaarutigaat, naalakkersuisunik Nuummi ataatsimeeqateqarnissartik. Angalanerlu naggaserlugu Qassiarsummi Tjodhildep oqaluffiani naalagiaqatigiittoqassaaq. Angalaqatigiit Narsarsuarmiit septembarip ulluisa 13-ianni angerlakaassapput.

Angalanermik aaqqissuisut tassaapput kattuffik, Upperisaq, ilisimatusarneq avatangiisillu qitiutillugit nunarsuatsinni ajornartorsiutaasut saqqummiuttarpaat. Kattuffimmi peqataasarput upperisarsioqatigiit assigiinngitsorpassuit, ilisimatuut, politikerit, illersuiniaqatigiit, tusagassiorfiit allarpassuillu.

Brasiliami Amazonip kuussua orpippassuaqarfiilu siorna takuniarneqarput.

Paaviugaluaq, Johannes Paul Aappaat, 2002-mi angalanermi peqataasimavoq, ukioq mannalu paavimik peqataasoqassanersoq, angalanermik ataqatigiissaarisoq juunip ulluisa 20-anni nunatsinnukarpat nalunarunnaassaaq.

RSE-mi illersuisunut ilaapput, EU-p ataatsimiititaliarsuani siulittaasoq, José Manuel Barroso, Naalagaaffiit Peqatigiillu qullersarisimasaat, Kofi Annan.