Upperisarsiornermut ilinniartitaaneq Pallep Danmarkimut nuulersaarpaa
Nunatsinni palasissaaleqineq qaangerniarlugu palasinngorniarluni ilinniartitaanerup nunatsinniiginnarnissaanik Naalakkersuisut sulissuteqaqqullugit aalajangiiffigisassatut siunnersuummik Inatsisartunut ilaasortat Ruth Heilmann, Kristian Jeremiassen Siumut inatsisartuni sinnersuuteqarput.
Ilinniartut naammapput amerlanerusariaqanngillat ikinnerusariaqaratillu nunatsinnimi palasitut atorfinnit25iusunit ataasseq inuttaqanngilaq Ilisimatusarfimmi upperisarsiornermik ilinniarfimmi pisoraq Aage Rydstrøm-Poulsen oqarpoq.
Ilisimatusarfimmi upperisarsiornermik ilinniarfimmi ilinniartut maannakkut aqqaniliupput.
Ilinniartitaanermut Naalakkersuisoq Palle Christiansen inatsisartunut ilaasortanut akissuteqarluni allappoq, Naalakkersuisuit tikkuaraat Ilisimatusarfimmi palasinngorniarluni ilinniarfimmi ilinniartut ikippallaartut ilinniartumullu ataatsimut aningaasartuutit naleqqutinngitsumik qaffasippallaartut.
Taanna pillugu Aage Rydstrøm-Poulsen oqarpoq, Ilisimatusarfimmi ilinniartunut aningaasartuutit 199 millioner koruuniusut 1 procentia upperisarsiornermut ilinniarfimmut atorneqartartoq tassalu 1,8 million koruunit.
Ilisimatusarfimmi upperisarsiornermik ilinniarneq ukiunik pingasunik sivissusseqartoq palasinngornissamut periarfissiivoq, tassanilu sapaatip akunneri 15-it København-imi palasinngorniat ilinniarfianni pikkorisartarput nunatsinni palasinngorsinngorsinnaanissamut.
Palle Christiansen ilaatigut oqarpoq, Palasinngorniarluni Ilisimatusarfimmi ilinniarneq ukiunik pingasunik sivisussuseqartoq nunani allani pitsaassutsinit appasinnerusoq.
Taanna pillugu Aage Rydstrøm-Poulsen oqarpoq upperisarsiornermik ilinniarfik nunani allani ilinniarfinni ilinniartitsissutigineqartartut assigalugit ingerlanneqartoq, tamannalu ilisimatuussutsikkut misissuinermit paasisat atorlugit qulakkeerneqartoq aamma misilitsinnermi naliliisartut nunani allani atorneqartut assigalugit.
Ilisimatusarfimmi upperisarsiornermik ilinniarneq ukiunik pingasunik sivisussuseqartoq naammassineqaraangat bachelorinngortoqartarpoq, taannalu naammassineqaraangat nunatsinni palasinngorniartoqarsinnaavoq, sapaatip akunnerini 15-it København-imi Pastoral seminariami pikkorissartitsinerup kingorna.
Palasissaaleqineq pillugu suleqatigiissitaliortoqassaaq tassani Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik, Ilisimatusarfik, Kalaallit Nunaanni Ilagiit aamma Ilinniartitaanermut Ilisimatusarnermullu Naalakkersuisoqarfik peqataatitaqassallutik.
