Upperisarsioqatigiit Irakimi aporaattuarsinnarput

Irakimi upperisarsioqatigiit aporaannerat ingerlanneqartuarsinnaarpoq. Muuamaamik upperisallit imminnut toqoraapput qunusaarullutillu. Inuit 60-t Bagdadimi ippassaq toqutaapput, ullaarlu qaartartumeerisoqarmat aamma toqusoqarluni.

Irakimi inuit assigiinngitsut akornanni perulluliornerit takornartaanngillat. Sapaatilli akunnerani kingullermi naalaffimmik qaartartumeerinerup kingorna perulluliornerit sakkortorput. Siornatigut perulluliortarnerni naalaffissuit saassunneqarneq ajorput. Qaartartumeerinerli killigalugu irakimiut imminnut upperisaqatigiikuutaarlutik akiniaatteqattaalerput.

Sunnisiortut aallaaserlutik shiasiortut najugaqarfiini angalaartarput nalunaaquttap akunnialunnguit nuunnissaanut piffisaqartillugit. Shiasiortut nuussimanngikkunik toqorarneqarnissaminnik siorasaarneqartarput.

Shiasiortullu amerlanerit shiasiortuinnaat najugaqarfiinut toqqissisimanissartik anguniarlugu qimarrapput.

Qimarratut ilaat nutaarsiassaqartitsiviit ilaannut oqaluttuarsimavoq siornatigut Irakimi sorsuuteeraqattaarnerit sakkortunerpaaffiini suna tamarmi aaqqissasoq neriuuteqartarsimalluni. Massakkulli sakkortusigaarmata neriuuteqanngivilluni.

Irakimi oqartussat nalunaarput naalaffissuup qaartartumeerneqarnerata kingorna 400-t missaat toqusimassasut. Tusarfiilli arlallit nalunaarput toqusut taakkunannga amerlanerusimassasut. Ulloq unnuarlu Bagdadimi qaartartumeerinerit seqqortaqattaarnerillu tusarsaajuarput.

Irakimi biili qaartinneqarmat inuit ikinnerpaamik 27-t toqutaapput 60-illu ikiligaallutik.