Upperisaq pillugu meeqqat allaaserisaqassapput

Kalaallit Nunaanni ilagiit inatsisaata ukioq manna 100-liinera malunnartinniarlugu ilagiinnut naalakkersuisoqarfimmi frimærkemik nutaamik ullumi saqqummiussineqarpoq ilaatigut meeqqat 5. klassemi atuartut qaaqqusanut ilaallutik.

Kalaallit Nunaanni ilagiinnut atuarfeqanermullu inatsit apriilip aallaqqaataanit 1905-meersoq ukioq manna assigiinngitsutigut malunnartinniarneqassaaq. Ilagiinnut kultureqarnermut Pisortaqarfimmi KIIIP-imi frimærke ilagiit 100-liinerannik eqqaasitsisussaq saqqummiunneqarpoq naalakkersuisumit Henriette Rasmussenimit biskop Sofie Petersenimut tunniunneqarluni. Qaaqqusat ilagaat Nuummi Kangillinnguit atuarfianni 5.klassemi atuartut, nukappiaraq niviarsiararlu sinerissami taamaaqatimik suliassinneqarnerannut atatillugu najuuttut. KIIIP-imi ilagiinnut kulturimullu siunnersorti Bula Larsen oqarpoq meeqqat taama ukiullit qaaqquneqarsimasut, sinerissami atuartut 5.klassemiittut suliassinneqarmata allagaqaqqullugit titartaaqqullugillu upperisamut ilagiinnullu tunngasunik, taamatummi ukiullit pissanganartunik allaasunillu aamma tamakku pillugit eqqarsarsinnaasarmata. Suliaat ukiup ilaa ilagiit pillugit atuakkiamut ilanngunniarneqarumaarput.

Bula Larsen aamma oqarpoq Ilagiit 100-liinerannut atatillugu augustimi ataatsimeersuarneqassasoq, Ilagiinnullu sammisumik atuakkiaq ukioq manna saqqummissasoq, meeqqat eqqartorneqartut suliaannik ilalimmik. Frimærki saqqummersoq eqqumiitsuliortup Aka Høeghip suliaraa.