Upernaviup nunaqarfiini imigassaq tunisaaleqquaa
Siunnersuumik saqqummiussaqartuuvoq Karl Kristian Kruse Siumumeersoq.
Upernaviup nunaqarfiini najugallit taamaallaat imigassamik pisisinnaapput Upernaviup illoqarfiani nunaqarfinnilu imigassap tunisaanissaa inerteqqutaalluinnarpoq.
Nalliuttorsiualaarniarnerni imigassamik pissarsiniarneq akisoqaaq aammalu inuit imminnut navialisittarput imigassartorsimallutik umiatsiamik angalagaangamik. Siunnersuummut tunngavilersuutit ilaatigut taama nipeqarput.
Siunnersuulli imaasiallaannaq taperserneqanngilaq. Aamma Upernaviup nunaqarfiinit imigassap ammaqqinnissaa kissaatitut saqqummiunneqarsimanngilaq ullumikkullu aaqqissuussineq pillugu naammagittaalliummik kommunimut tunniussisoqarsimanani.
Kommunalbestyrelse aalajangerpoq siunnersuut Upernaviup nunaqarfiini tusarniaassutigineqassasoq novemberimilu kommunalbestyrelse ataatsimeeqqilerpat uterfigineqassasoq.
Upernavik immikkut kommuneqarfiugallarmat nunaqarfinni imigassamik nioqquteqarneq matuneqarpoq, tamannalu pivoq nunaqarfimmiut namminneq kissaateqarnerat tunngavigalugu.