Upernaviup eqqaani tunitsiviliinissat akuerineqarput

Upernaviup eqqaani aalisartunut naammaginartumik tunitsivissaqannginneranik ajornartorsiuteqarneq maanna iliuuseqarfigineqalerpoq.
Allattoq Elisa Isaksen
juulip 13-at 2010 15:54

Piffissami kingullermi aalisartitseqatigiiffiit pingasut umiarsuarnik tunitsiviliinissaminnut akuerineqarput. Atassummeersup Knud Kristiansenip § 36 najoqqutaralugu apeqqutaanut aalisarnermut naalakkersuisoq Ane Hansen taama akissuteqarpoq.

Halibut Greenlandip tunitsiviliinissamik qinnuteqaataata itigartinneqaraluartup naliliiffigeqqinneratigut maanna tunitsiviliisoqartussanngorpoq.

Taamatut nutaamik naliliisoqaqqippoq, Upernavik Seafoodip, Upernaviup nunaqarfiisa avannarlerpaap tulliani Nuussuarmi juunip naalernerani tunisassiorfiliorniarluni neriorsuutini piviusunngortissinnaanngimmagu.

- Upernavik Seafoodip tulaassuiffissaa Nuussuarmiittussaagaluartoq naammassineqarsimanngitsoq suliaqarnissamullu piareeqqanngitsoq, qanittukkut paasivara, tamannarpiarlu pissutigalugu Halibut Greenland Upernaviup eqqaani umiarsuarmik tunitsiviliinissaa akueraara, Ane Hansen Knud Kristiansenimut juunip 24-anni akissummini taama allappoq.

Siusinnerusukkut aalisartoq Henrik Sandgreen suliffeqarfiillu suleqatigiit marluusut, tassa Qeqertaq Fish aamma Uummannaq Seafood tunitsiviliinissamut assartuinissamullu akuerineqareerput.

Tamatuma peqatigisaanik Upernavik Seafood nalunaarpoq, juulimi aggustimilu tunitsivinnik arlalinnik ammaanissamut piareersimassallutik, taamaattumik Ane Hansen isumaqarpoq taamaalilluni Upernaviup eqqaani naammattunik tunitsiveqalissasoq.