Upernaviup eqqaani nuna sajuttoq
Upernavimmiut arlallit tallimanngormat ullaap tungaa tusaasaqarsimapput nunap iluani qaarpallannermut assersuunneqarsinnaasumik. Maanna paasinarsivoq Upernaviup eqqaani nuna sajussimasoq.
- Paasissutissat pigisavut najoqqutaralugit takusinnaavarput Upernaviup ungasinngisaani sakkukitsumik nuna sajussimasoq tallimanngormat nalunaaqutaq 11.15-ip missaanni. Nunap sajunnera richterip uuttuutaa malillugu 2,6-mut uuttorneqarpoq, Danmarkip nunattalu ujarassiooqarfianni GEUS-mi nunap sajunneranik misissuisartoq Tine Larsen KNR-mut taama oqaluttuarpoq.
Upernavimmiut arlallit nunap sajutsiarnera malugaat. Ilaat isumaqarsimapput containerit uppittut. Allat isumaqarsimagaluarput arlaannik qaartiterisoqartoq.
- Ukiorpassuarni Upernavimmi najugaqarpunga. Aatsaat nunap sajunnera malugaara. Allaanngilaq nunap iluani qaarpallattoqartoq kingornalu sajunnera malunnatsiarluni, Martin Mørch KNR-mut oqarpoq.
Qaqutigoorpallaanngilaq nunatta sineriaani nunap sajuttarnera, Tine Larsen GEUS-imiik oqaluttuarpoq.
Malugineqarsinnaasumik nunap sajunnera kingulleq Qeqertarsuarmi 2005-mi malugineqarpoq, taamanikkut nunap sajunnera richterip uuttuutaani 4,5-mut uuttorneqarpoq.
Nunatsinni nunap sajunnera sakkortunerpaaq uuttorneqartoq 2001-mi Maniitsumi pivoq. Taamanikkut richterip uuttuutaa malillugu 4,9-mut uuttorneqarpoq. Taamani nunap sajunnera Nuummi Sisimiunilu malugineqarpoq.
