Upernaviup eqqaani ajunaarlernermik kalerrisaarineq politiit suli misissorpaat
Salloqittaalluni kalerrisaarineq inuup inuuneranik naleqarsinnaalluaraluartoq, Uummannami politiit ittuata, Bo Borgnæsip oqaatigaa, tassami ujaasinermi annaassiniartartut atortullu tamarluinnagajaasa atorlugit Upernaviup eqqaani ujaasisoqarmat.
- Salloqittaalluni ajunaalernermik kalerrisaarigaanni inuit allat inuunerannik navianartorsiortitsineruvoq. Tamassuma saniatigut inuiaqatigiit aningaasaataannik ikigisassaanngitsunik asuliinnaq atuisitsineruvoq,
Uummannami politiit ulluinnarni aqutsisuat, Bo Borgnæs oqarpoq.
Salloqittaalluni kalerrisaarinerup kingorna ujaasinermi atorneqarput, Sakkutuut umiarsuaat 'Knud Rasmussen', sakkutuut timmisartua Challenger, Upernavimmiut umiatsiaararsortut aammalu politiit angallataat.
Ujaasineq inuiaqatigiit aningaasaataannik asuli atuineruvoq. Salloqittaalluni kalerrisaarisoq tigusarineqaruni, taanna aningaasanik ikigisassaanngitsunik akiliisinneqarnissani naatsorsuutigisinnaavaa.
- Salloqittaalluni ajunaalernermik kalerrisaarisoq tigusarigutsigu, taannalu eqqartuussisunut tunniukkutigu, ujarlernermi akissaajaatigut tamarluinnaasa taassuminnga akilerneqarnissaat piumasarissavarput, Bo Borgnæs oqarpoq.
Salloqittaallu kalerrisaarinermi pinerluttulerinermi inatsit paragraf 44 unioqqutinneqartarpoq. Taannalu ilaatigut ima oqaasertaqarpoq:
-Pissutissaqanngitsumik ikiorneqarnissamik kalerrisaarisoq, kalerrisaarummik atornerluisoq imaluunniit tamassuma assiganik iliuuseqarnerup kinguneranik annaassiniartunik aallartitsisoq eqqartuunneqassaaq...'
Tassalu pinerluttulerinermi inatsisip taassuma kingunerissavaa akiliisitaanerup saniatigut pinerlussimasut isertitsivianniittussanngorlugu pineqaatissinneqarneq.
Inuiaqatigiit aningaasaataannik asuuliinnaq atuisoqassanngimmat, politiit pingaartippaat salloqittaalluni kalerrisaarisimanerup paasiniarneqarnerata naammassineqarnissaa.
- Suliap uuma naammassineqarnissaa ilugersuutigaarput, taamaattumik paasisagut tamarluinnaasa paasiniaqqissaarpavut, tassami siunertaraarput kina imaluunniit kikkut taamaaliorsimanersut paasissallutigu,
Uummannami politiit ulluinnarni aqutsisuat, Bo Borgnæs oqarpoq.
Oktobarip quligiluaanni kalerrisaarereernerup kingorna ujaasinermi ajunaarsimasinnaasunik nassaartoqanngilaq aamma inunnik maqaasisaqartunik nalunaartoqarani. Upernavimmi politiit innuttaasut qinnuvigaat, kalerrisaarinermik ilisimasaqarunik politiinut saaffiginneqquneqarput oqarasuaammut uunga: 96 12 22.
