Upernaviup eqqaani aalisarfiit nalunaarsorneqarput

Upernavimmi nunaqarfittaanilu innuttaasut sumi ammassanniartarnersut, eqalunniartarnersut nipisanniartarnersullu, Pinngortitalerifiimmit januaarimi paasiniaavigineqarput.
marsip 04-at 2010 04:34

Aalisagaqatigiit allallu uumassusillit sumiinnerisa ilisimanissaat, aamma aalisakkat aalisarneqartartut sumiittarneri nalunaarsorneqarput.

Uuliasioqatigiit Cairn, Qeqertarsuup kitaata avannaani, aasaq manna juunimi, uuliasiorlutik qillerinissaannut tunngatillugu apersuilluni misissuineq pivoq.

- Aalisartut, piniartut, allallu pinngortitamik atuisut, katersortarfinnut innuttaasullu illuinut ilisimatuunit aggersarneqarput, naapeqatigiinnissamullu soqutiginnittoqarluarluni, Pinngortotaleriffimmit ilisimatitsissutigineqarpoq.

Pinngortitami uuliaarluertoqassagaluarpat, sinerissami mianerisariaqartut sumiissusersinissaannut, katersat ilisimalikkat Namminersorlutik Oqartussanit atorneqarsinnaapput, aamma uuliaarluertoqassagaluarpat aalisakkanik pinngortitamillu ajoqusiisinnaanerup annikitsuutinnissaanut upalungaarsimanissamut atorneqarsinnaallutik.

Pinngortitaleriffik aamma Danmarks Miljøundersøgelser, DMU, Kalaallit Nunaata Kitaata sineriaani aalisagaqatigiit pillugit apersuillutik siusinnerusukkut misissuisareerput.