Upernavimmiu: Sooruna Qasigiannguanisulli pineqanngitsugut

Coronavirusi Upernavimmi tuniluutipiloorunnaaqqullugu oqartussat suliniutaat Upernavimmiunit naammagineqanngillat.

Upernavimmiut affaat covid-19-imik tunillanneqarsimassasut nunatta nakorsaanerata Henrik L. Hansenip ippassaq oqaatigaa.

Taama naliliineq Upernavimmiup Anine Mørchip isumaqatiginngilaa. Tunillanneqarsimasunimmi misissuisoqartinnagu taamatut inerniliisoqarsinnaanngitsoq taanna isumaqarpoq.

- Nakorsaanerup naliliinera uagut akuerinngilarput. Orninneqarata takuneqaratalu innuttaasut affaat coronartutut nalilerneqartut aali takuneqarata, Anine Mørch taama oqarpoq.

AAMMA ATUARUK Corona pillugu ullumikkut kisitsisit: Ataasinngornermiit tunillatsissimasut nutaat 87-it paasineqartut

Coronavirusi Upernavimmi najugaqartut 1.100-t missaanniittut akornanni tuniluutipiloortoq novembari qaammataata qiteqqunnerani paasineqarpoq.

Tuniluutipiloortoqarnera peqqinnissaqarfimmit tupaallaatigineqartoq nakorsaarnerup siusinnerusukkut oqaatigaa.

- Upernavimmi tunillatsissimasut amerlangaarmata innuttaasut ikinnerpaamik affaat tunillatsereersimanissaat ilimagaarput, nakorsaaneq Henrik L. Hansen oqarpoq.

Qasigianngunut inuit sisamat suliartortinneqartut

Upernavimmi inuit taama amerlatigisut tunillanneqarsimammata misissuinissaq pisariaaruttoq oqartussat aalajangiuppaat.

Nukiit ikiorneqartariaqartunut atorneqassammata.

Nunatsinni coronavirusimik tunillanneqarsimasut nalunaarsorneqarneri, Nuummi qamittooqqareernerup kinguneranik, ullualunni nutarterneqanngereerlutik ippassaq saqqummerput.

Qasigiannguani coronavirusip tuniluutilersimanera paasineqarpoq. Tassani ikinnerpaamik 50-it tunillanneqarsimallutik.

Tuniluunneq pakkersimaarniarlugu Peqqinnissaqarfik sulisunik sukkanerpaamik Qasigiannguanukartitsivoq.

- Qasigiannguanili tuniluunneq Upernavimmut sanilliullugu suli unitsissinnaassallugu nalilerparput, Henrik L. Hansen oqarpoq.

Upernavimmilu assinganik iliortoqannginnera Anine Mørchip pakatsissutigaa.

- Taava Qasigiannguanut maanna peqqinnissaqarfimminngaanniit ornigunniarpalupput. Tamakkua aamma isigalugit immitsinnut sanillersuunnaqaaq. Avannaani innuttaasuulluni immikkoortitatut misiginaqaaq, Anine Mørch oqarpoq.

Peqqinnissaqarfiup Upernavimmi coronavirusip tuniluunnerani taavani sulisut oqilisaanniarlugit sulisumik ataatsimik avannamukartitsitsisimavoq.