Upernavimmit timmisartuunneqartussat tamangajammik aallareertut

Air Greenland Upernavimmi Upernaviullu eqqaani sapaatip akunnerata naanerani immikkut timmisartuussisaqattaarpoq. Ajornartoqanngitsumillu timmisartuussisarsimapput, ilaasullu tamangajammik apuuffissaminnut apuunneqareerlutik. Air Greenland arfininngornermi ualikkut taama nalunaaruteqarpoq.
S-61 Helikopter Assi © : Robert Holmene
decembarip 17-at 2016 17:45

Teknikkikkut ajutoortarnerit silarluttarneralu pissutigalugit Upernaviup eqqaani timmisartuussinerit novembarip 21-aniilli kinguaattoorujussuaqataalerput, ilaasussallu 94-it apuuffissaminnut timmisartuunneqarnissartik tallimanngormat utaqqivaat.

Taamaammat Issittumi Sakkutooqarfiup qulimiguuliutimi s-61-ip arfininngornermi angallassisarnissaanut immikkut ittumik akuerigaa Air Greenland tusagassiuutinut nalunaarpoq.

Sakkutooqarfiullu qulimiguuliutaa qulimiguulillu Upernavimmi atorneqartoq arfininngornermi aallaqattaarput.

Taamaalillunilu ilaasut tamangajammik apuuffissaminnut apuunneqarput.

Ilaasussat sinneri kujataanukarnissaannut sapaatip akunnerata naanerani atassutissaqannginnamik ataasinngorpamut utaqqisariaqartut, Air Greenlandip nalunaarutigaa.