Upernavimmi silarloqattaarnera pissutigalugu Air Greenlandip timmisartuutaa Upernavimmut missinnaasimanngilaq. Ilaasussat, meeqqat, ilinniartut allallu taamaalillutik piumassuserinngisaminnik sulinngiffeqarnertik sivitsortariaqarsimavaat.
- Maannamut sisamariarluta Upernavimmukaraluarpugut silarlunnerali pissutigalugu utiinnartariaqartarsimalluta. Ippassarlu Upernavimmukarniaraluarpugut teknikkikkulli ajornartorsiuteqaleriasaarnerput pissutigalugu anngutinngitsoorpugut, timmisartorlu aaqqissuunneqartussaq maannakkut Pituffimmiippoq, Air Greenlandimeersoq, Thomas Leth Jørgensen oqarpoq.
Nutaarsiassarli nuannersoq tassaavoq Upernavimmiit ilaasussat 78-it ullumikkut immikkut timmisartuussisoqarneratigut sumunnarfissaminnut apuunniarneqartussanngorput.
- Ullup ingerlanerani pingasoriarluni timmisartuussinissaq pilersaarutigaarput, ilaasussallu avannaanit kujataatungaanukartinneqariarlutik allamut ingerlaqqiffissaminnut apuunniarneqassapput, Thomas Leth Jørgensen oqarpoq nangillunilu:
Ilaasut allamut ingerlaqqittussat ilaat aqagu ingerlaqqissinnaassapput, ilaasussallu amerlanngitsut kujataanukartussat sapaatip akunnerata tullianut utaqqisariaqassapput.