Upernavimmiit siunnersuut nalorninartinneqarpoq

Nunami suliffillit ukiuunerani piffissami killilimmi suliassaaruffimmi aalisarsinnaanermik allagartaqartuuppata, ajornartorsiutit arlallit imaaliallaannaq iluarsineqarsinnaagaluarput. Upernavimmi Inuussutissarsiornermut Siunnersuisoqatigiit taama isumaqarput, oqarlulutik ukiumi suliassaaleqinermi sikukkut qaleralinniarnissaq periarfissaasariaqartoq

Taama aaqqissoqassappat Naalakkersuisoq Finn Karlsen pitsaaquteqartitsillunilu illuatungeqartitsivoq.

Nunami sulisut, ukiumi suliassaaleqinermi angerlartiinnarneqartartut, piffissami killilikkami aalisarsinnaanermut allagartaqarsinnaasariaqarput. Upernavimmi inuussutissarsiornermut siunnersuisoqatigiit aalisarnermut naalakkersuisumut ippassaq taama siunnersuuteqarput.

Taamaalilluni suliffisasaleqisut sikukkut aalisarnermikkut imminnut pilersorunik kommunimit suliffissaaleqinersiuteqassanngillat, kommunip aningaasaqarneranut iluaqutaasumi.

Kisianni avannaani aalisartut qaleralinnik paggaput, pisassallu killilersugaapput,

- Illua tungaani qalerallit killilersugaapput, illua aamma sooerunami suliffissaaleqineq annertuvoq. Taava taamaammat taakkua immikkut  tamaasa isiginiarlugit nalilersuisariaqassaagut, siunnersuummik taamaattumik takkuttoqarpat, Aalisarnermut, piniarnermut nunalerinermullu naalakkersuisoq, Finn Karlsen, oqarpoq nanguillunilu: 

- Kisianni tassa Upernavimmi isumasioqatigiissimanermut tunngatillugu inernerinik imaluunniit piumasaqaatinik uagutsinnut apuussaqarpata nalilersuissaagut, kisianni suli apuussaqannginamik.

Nunami sulisut qaleralinniarnissamut periarfissaqalernissaat ileqqunit aallaaveqarpoq.

- Sikusartuni qangalili ileqquuvoq sulisartut suliassaarukkaangamik sikunera pissutigalugu aalisartunngortartut. Taava ukiuunerani aalisarneq nappatigalugu. Kisianni pisassiissutit eqqunneqarneranniit ajornarsinikuuvoq nunap qaani sulisartuugaanni qaleralinnik tunisisinnaaneq. Allatut ajornartumik taava inatsisit allanngortittariaqarnerannik siunnersuuteqarluta misissuisitsillutalu pivugut, Gerth Jacobsen, Upernavimmi inuussutissarsiornermik siunnersuisooqatigiit siulittaasuat oqarpoq.

Tassalu siunnersuut piviusunngorpat, tamanna kommunipisunmaginninnermut aningaasartuutaanut apparsaataassasoq, Upernavimmi inuussutissarsiornermi siunnersuisoqatigiit qulauuritinngilaat. Naak Finn Karlsen oqaraluartoq, siunersuumik takusaqarsimanani, siunnersuisoqatigiit oqarput, siunnersuutsik Inatsisartut aalinsarmernut ataatsimiititaliaanut nassiussimallugu.