Upernavimmi Uummannamilu qaleralittassat amerlivaat
Kommuninut taakkununnga marluusunut 2008-mut pisassiissutit sinnerlugit pisaqartoqarsimavoq, taamaattumik ukiornmannamut aappaagumullu pisassiissutit naalakkersuisut amerlivaat.
Taamaalilluni Kommuneqarfik Upernavimmi ukiormanna pisassiissutit 5.500 tonsinut amerlineqarput aappaagulu 500 tonsinik amerlillugit 6.000 tonsinngortinneqassallutik.
Uummannap kommuniani pisassiissutit ukiormanna 5.000 tonsinngortillugit amerlineqarput taakkulu 2009-mi nikisinniarneqaratik.
Qeqertarsuup Tunuani sinerissamut qanittumi qaleralinniarneq annertuumik kinguariarfiusimavoq. Tamaanilu pisassiissutit 8.800 tonsinut ikilisinneqarput. Ukiormanna pisarineqartut ikileriangaatsiarnerat malunniutereersimavoq, taamaattumillu aalisarneq annikillisinneqanngippat ajalusoortoqarsinnaanera ernummatigineqarluni.
