Upernavimmi Uummannamilu 2010/2011-mut qilalugartassat agguaanneqarput

Upernavimmi qilalukkat qaqortat ima agguataarneqarput:

104-t inuussutissarsiutigalugu allagartalinnut, taakkunannga 85-it paggatassiissutaallutik, kingulliillu 19-it makitsinikkut agguaanneqassallutik.

Sunngiffimmi pinialuttartunut aqqanillit pisassiissutigineqarput, taakkunannga arfineq-marluk paggatassiissutitut, kingulliit sisamat makitsinikkut agguaanneqassallutik.

Upernaviup eqqaani qilalukkanik qernertanik pisassat siusinnerusukkut agguaanneqareerput.

Uummannami qilalukkat qaqortat 19-it pisassiissutigineqarput. 14-it inuussutissarsiutigalugu allagartalinnut, taakkunannga qulit paggatassiinikkut, sinnerilu sisamat makitsinikkut agguaanneqassallutik.

Sunngiffimmi pinialuttartut tallimanik pisassinneqarlutik, taakkunannga pingasut paggatassiissutitut, kingulliillu marluk makitsinikkut agguaanneqassallutik.

Qilalukkanik qernertanik pisassiissutit 85-it, tamarmik inuussutissarsiutigalugu allagartalinnut pisassiissutigineqarput, taakkua iluanni 75-it paggatassiissutigalugit, kingulliit qulit makitsinikkut agguaanneqassallutik.

Pisuussutit Uumassusillit pillugit Ataatsimiititaliaq aamma aalajangiivoq qassusersorluni qilalugarniarneq ukiumi piniarfiusumi 2010/2011-mi atorneqassanngitsoq, qassusersornikkut qassit pisarineqarsimanerat nakkutigineqarsinnaanngimmat, taamaalillunilu sippuinissaq ilimanaateqarpallaarluni.

Qeqertarsuup Tunuani qilalugarniarnissaq pillugu tusarniaanerit maanna ingerlanneqarput, tusarniaanerit oktobarip 13-iata kingorna naammassiniariarpata ataatsimiititaliamut aalajangigassanngorlugit saqqummiunneqassallutik.