Upernavimmi sulisussaaleqisoqarnera illoqarfimmut tippatsitsisoq

Anartarfiit eqqaaviillu aqquserngup sinaani tippaattut.

Upernavimmi anartarfiit kuuffeqanngillat, puussialersugaapput sapaatip akunneranut pingasoriarlutik taarsersorneqartartut Sulisussaaleqinerli pissutaalluni sapaatip akunneri marlunngulersuni taarsersuisoqarsimanngilaq, tamannalu atuisunut eqquinerluppoq.

- Anartarfiit poorsui aqquserngup sinaanut miloriullugit qaarartitileramikkit, ilaallu uninngavallaarlutik kuulersimallutik. Taakkualu aamma niviukkanut qallisaasaramik soorlu peqqinnarpallaanngitsoq uagutsinnut, Upernavimmi innuttaasut ilaat Jan Kleinschmidt oqarpoq.

Ataasinngorneq. pingasunngorneq tallimanngornerlu anartarfiit imaarneqartaraluarput. Sulisussaaleqinerlu pissutigalugu atuisut anartarfiit puussiartassaannik atuisut maanna tunineqaannartarput.

- Anartarfiit uagut nammineq piiartariaqartarpagut, eqqaaviillumi.

Puussiarsuilli aaneqarneq ajorput.

Sulisussaaleqisoqarpoq

Avannaata Kommuniata inatsisitigut pisussaaffigaa anartarfiit eqqaaviillu isumagineqarnissaat. Sulisussaaleqisoqartilluguli tamanna naammassiuminaattarpoq.

- Sulisugut peqanngeqattaalermata, sulinngiffeqarnermikkut imaluunniit allamik suliffittaarsimanermikkut aasaanerani taanna ajornartorsiut pingikkajuttaratsigut, kisianni aatsaat taama annertutigisumik misigivarput. Massakkut paasitinneqarpunga sulisut pingasut suliartorsimasut, taava neriuinnaassuunga sulisut uteqqillutik suliassatik suliarissagaat, Teknikkikkut ingerlatsivimmi pisortaq Nick Nielsen oqarpoq.

Anartarfiit poorsui aqquserngup sinaanut miloriullugit qaarartitileramikkit, ilaallu uninngavallaarlutik kuulersimallutik. Taakkualu aamma niviukkanut qallisaasaramik soorlu peqqinnarpallaanngitsoq uagutsinnut.

Sulisussaaleqisoqartillugu anartarfiit eqqaaviillu taarserneqarnissaat anguniarlugu Avannaata Kommuniata suliffeqarfimmik namminersortumik suleqateqarput. Suliassalli juulip ulluisa 19-ianili unittoorsimasut oqaatigaa.

Silap kiarujuttaarnerata ajornerulersippaa

Anartarfiillu aqquserngup sinaani uninngaannarneri aasarisseruttornerani aamma tippaatilersimapput:

- Aasaagami kiattorsuullunilu maangaannaq kuunneri soorunami aamma sakkortuumik tipiliorput, Jan Kleinschmidt oqarpoq.

Anartarfilerineq eqqaavilerinerlu pissusissamisut ingerlanngikkaluartoq atuisunut akiligassiissutit ikileriaateqassanngitsut Avannaata Kommunianit paasissutissiissutigaat. Innuttaasulli sullinneqanngivissimasut kommunimut saaffiginninnissaat innersuussutigineqarpoq.

Ajornartorsiut qaqugu aaqqivigineqassanersoq teknikkikkut ingerlatsivimmit oqaatigineqarsinnaanngikkallarpoq, erngerlunili aaqqivigineqarnissaa pisortap neriuutigaa.