Upernavimmi qinigaasinnaanermut akuerisaanngitsut

Kommunimut qinersinermi kingullermi, Upernaviup kommuneani qinigaasut marluk, ukiuni kingullerni tallimani pineqaatissiinneqarsimammata qinigaasinnaanermut ataatsimiisitaliamit qinigaanerat atorunnaarsinneqarpoq. Qinigaasinnaajunnaarsitaasup aappa, Kim Høegh Dam, ima oqarpoq;

- Paasisinnaavara taamaaliorsimanerat, isumaqarsimagaluarpungami iliuuserisimasap ullorpiaaniit qinersinissap tungaanut ukiut tallimat qaangiussimanerani qinigaasinnaasanngitsut, sunaaffa aatsaat pineqaatissinneqarnermit, ukiut tallimat aatsaat qaangiukkaangata qinigaasinnaanngortartut, Kim Høegh Dam oqarpoq, nangillunilu;

- Tupaallaatigigaluarpara inatsisilli taamaapput, allatullu ajornaqaaq. Inatsisartuni ilaasortat allat Naalakkersuisullumi ilaat pineqaatissinneqartarsimapput, taamaammat tulliani qineqqusaarnissamut peqataassaanga, Kim Høegh Dam naggasiivoq.

Upernaviup kommuneani Siumup immikkoortortaani siulittaasoq Henrik Mørch oqarpoq, Siumut sinnerlugu kommunalbestyrelsemut ilaasortanngortut affaat qinigaasinnaanngitsutut ataatsimiisitaliamit nalilerneqarnerat ajuusaarnartoq.

- Taamaattoqarnera ajuusaarnartutut isigaara, kisiannili qanoq iliuuseqarfigisinnaasimanngilarput, aamma pisinnaatitaaffeqanngilagut pinerluuteqarsimannginneri paasiniaarsinnaassallugu, Henrik Mørch oqarpoq nangillunilu;

- Una qinersineq Kalaallit Nunaata tamarmi ilinniarfigiumaarpaa.

Taama oqarpoq Henrik Mørch, Upernavimmi Siumup immikkoortortaqarfiani siulittaasoq.

Qinigaasinnaajunnaartunut taarsiullugit iserput, Adam Jonas Grim, Tasiusaminngaanneersoq, aapparalugu Kangersuatsiaminngaanneersoq Edvard Immanuelsen.