Upernavimmi politiit ujaasinerminni ataasiinnavimmik neriuuteqalerput
Arnap ujarneqartup oqarasuaataani angallattakkami paasissutissat politiit ujaasinerminni atorniarpaat, namminnerlu piumassutsiminnik ujaasiniartut ujaasinertik nanginniarneraat nammineq aalajangissagaat politiit nalunaarput.
- Politiit ujaasinertik unitsippaat angalasullu namminerlu piumassutsiminnik ujaasiniartut arnamik 22-nik ukiulimmik ujaasinissaannik kaammattorneqarlutik.
Aamma atuaruk 22-nik ukiulik Upernavimmi ujaarineqartoq
- Timmisartortitseqatigiiffiiup Air Greenlandip qulimiguuliini aquttut qinnuigaagut Upernaviup eqqaani ingerlaarnerminni alapernaaserluaqqullugit.
- Arnap 22-nik ukiullip maanna ujaarineqartup oqarasuaatikkut angallattakkakkut attavigisimasai kingulliit maanna oqaloqatigereerpavut, Michael Tange, Upernavimmi politeeqarfimmi politiassistenti KNR-imut oqarpoq.
Ujaarineqartoq arnaq 22-nik ukiulik kingullermik takuneqarpoq Upernavimmi eqqaavissuup eqqaani tallimanngornermi ullaakkut arfineq marlup missaanni. Ilaqutaasut, ikinngutaasut namminnerlu piumassutsiminnik ujaasisut - ujaarineqartumik suli ujaasipput.