Upernavimmi peqqissuseq misissuivigineqalersoq

Aqagu septembarip aqqaneq-aappaanni. ilisimatusarnermik suliallit angallammut attartukkamut Kisamut ilaallutik Upernaviliarlutik aallassapput. Kalaallit Nunaanni innuttaasunik misissuinissamut atatillugu innuttaasut 160-t Upernaviup illoqarfiani najugallit tassungalu atatillugu inersimasut tamarmik Kullorsuarmi, Innaarsunni Aappilattumilu misissortinnissamut periarfissinneqassapput.

- Siusinnerusukkut misissuisarnerit takutippaat aamma nunaqarfinni inuppasuaqartoq maluginagu sukkornermik, aap qaffasippallaarnerannik, aakkullu orsoqarpallaarnermik nappaateqartut, Issittumi ilisimatooq misissuinermilu aqutsisoq Peter Bjerregaard taama oqarpoq.

Upernavimmi misissuineq septembarip oktobarillu ingerlaneranni pissaaq. Misissuinermi immersugassaq tunngavigalugu apersuisoqassaaq, aap sukkuanik uuttortaasoqarlunilu, aap naqitsineranik uuttortaasoqassaaq, uummatillu tillerneranik misissuineq ingerlanneqassalluni, kiisalu timip atortarnera apersuutigineqassallunittaaq.

Tamanna itinerusumik paasisaqarfigineqarsinnaavoq nittartakkami www.folkesundhed.gl – imi.