Upernavimmi niisarnamaleqaat. Aatsaat taama avannarpasitsigisumi pisaqartoqartoq piniartoq Samuel Mørch unnersiorpoq.
- Ippassaq 24. sept. 2007 sila atoruminartoq ullup ilaa seqinnarissisoq, imarlu aalataartoq ullup qiteraraa piniartup ilaata VHF radioaqqakkut niisarnat Upernavimminngaanniik avannamut 21 km missarpiaani "Assaquttap" alannguatungaani "Tukingasup" eqqaaniittut arlalissuit takullugit suaarutigai, uagullu ornippagut, Samuel Mørch oqarpoq.
Piniarneqaleraluarlutik "avaaruminaatsinneqartarlutik" ungoorusaarneqalerput sissamullu "putsinneqarlutik".
- Niisarnallu sissamut pummata seqqungassap pisaqarnissallu ajornanngissusia misigalugulu takuarput, nangippoq.
Taamaalillutik Upernavimmi piniartut sunngiffimmilu pinialuttartut umiatsiat 30-t missaanniittut 100-t missaannik niisarnarput.
- Peqatigiilluta nuannersumik aatsaat niisarnanik takulluta amerlanerusugut pernannguarujugut, Samuel Mørch oqarpoq.
Samuel Mørch ualimut oqarpoq niisarnat neqaat qimminut nerukkaatigineqassasut inunnullu akeqanngitsumik agguaanneqarlutik. taamaattumik Upernavimmi eqqaanilu niisarnap neqaanik amigaateqalernavianngikkallarput.
