Assit: Upernavimmi nanoq qimmiaqqamut saassusereertorlu toqunneqartoq
Nanoq illoqarfimmut qanillattormat inunnut navianartorsiortitsisinnaammat toqunneqartariaqarsimasoq, politiini pingaartoq paasissutissiivoq.
Allattoq Ane-Marie Petersen
novembarip 03-at 2018 13:09
Nanoq Upernavimmi tallimanngornerup unnukkuani toqunneqarpoq.
- Tallimanngornerup unnukkuani nalunaaqutaq 20:45 Upernavimmi politiit kalerrinneqarput illoqarfiup killigani nanumik takusoqarsimasoq, politiini pingaartoq Jan Geisler oqarpoq.
Nanorli qanillattuinnarsimanngilaq.
- Politiit aggeramik nanoq naammattoorpaat illoqarfimmut illunut qanittoq, taavalu nannup qimmip piaraa toqussimagaa.
Politiit takkunnerannit minutsit aqqaneq-marluk qaangiuttut nanoq toqunneqarpoq.
- Nannup Upernavimmi illunut qanillattornera pissutaalluni inunnut navianartorsiortitsisinnaammat politiinit toqunneqartoq politiini pingaartoq Jan Geisler oqarpoq.
