Upernavimmi meeqqat suli amerlanerit atornerlunneqarsimagunarput
Upernavimmi isumaginninnermut allaffimmut meeqqanik kinguaassiutitigut atornerluisimanerit pillugit saaffiginnittoqartarpoq.
Saaffiginnissutaasartut tamakku tunngavigalugit Upernavimmi Isumaginninnermut pisortaq Dariusz Sobczynski isumaqarpoq, kinguaassiutitigut atornerluisimanerit maannamut ilisimaneqartuniit amerlanerusimassasut.
“Saaffiginnissutit nutaat arlallit takkupput, pasitsaassaqarpugullu massakkut suliareriikkatsinni suli allanik aamma atornerluisoqarsimagunartoq”, taama Dariusz Sobczinski oqarpoq.
Ataasinngormat radio aviisikkut tusarliupparput, 2002-p 2003-illu ingerlanerini meeqqat pingasut angummit maanna politiinit killisiorneqareersimasumit kannguttaatsuliorfigineqarsimasut.
Qularutigineqanngilarlu suli allanik atornerlunneqarsimasunik peqarsimasinnaanera.
Taamatuttaaq Upernavimmi isumaginninnermi allaffeqarfiup nersualaarpai inuit sapiillutik pineqarsimanertik pillugu nalunaaruteqarsinnaasimammata.
“Sapiiserluni unnerluussineq tarnikkut nukittusaarsinnaanermik imaqarpoq”, Dariusz Sobczynski oqarpoq.
