Upernavimmi meeqqat inuusuttullu ornittagassiuunneqarput

Upernavimmi meeqqat inuusuttullu qaammatini kingullerni pissanngallutik malinnaavigaat illup klubbitut atorneqartussap sananeqarnera, klubbi taanna meeqqanit arfineq-marlunnik ukiulinniit inuusuttunut 18-inik ukiulinnut tungaannut atorneqartalissaaq.
aggustip 18-at 2009 07:10

Illu kiisami naammassivoq, pisortatigoortumillu sapaatiuppat ammarneqassasoq ikiuiniaqatigiiffik Red Barnet ilisimatitsivoq.

- Meeqqat inuusuttullu kikkulluunniit illumik atuinissamut tikilluaqqusaapput. Qasuerserfissaminnik ulluinnarni pisariaqartitsigunik toqqissisimanartumik ornittagassaqartariaqarput, Red Barnetimiit Kalaallit Nunaannut pilersaarusiornernut ataqatigiissaarisoq, klubbiliornermillu nakkutilliisoq, Dorrit Hermann, oqarpoq.

Upernavimmi meeqqat inuusuttullu arlallit 2006-imi imminnut toqupput. Red Barnetimit neriuutigineqarpoq klubbeqalerneq assingusumik pisoqannginnissaanut meeqqat inuusuttullu iluaqutigissagaat.

Meeqqat mikinerit ualikkut klubbimiittassapput, angajulliunerit unnukkut. Klubbimi qarasaasiartoqarsinnaavoq, nerrivimmi arsaarartoqartoqarsinnaalluni imaluunniit kammalaatigiit, ikinngutigiit ilisarisimasallu arlaannik sammisaqarsinnaallutik. Klubbimi sisamanik sulisoqassaaq, ataaseq pisortatut sulissalluni. Inuusuttulli meeqqat inuusuttullu klubbianni susoqartarnissaanik aamma aalajangeeqataasinnaassapput.

Nunatsinni illoqarfinni marlunni allani aamma klubbeqarpoq, taakkulu ingerlalluartut Red Barnet ilisimatitsivoq. Nuummimi Qaanaamilu klubbeqarpoq, meeqqanit inuusuttunillu atorluarneqaqisunik.

VILLUM KANN RASMUSSEN-ip ANINGAASAATEQARFIA Upernavimmi klubbissamut aningaasaliisuuvoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq