Upernavimmi immikkut timmisartuussisoqalerpoq
Air Greenlandip sapaatip akunnerata naanerani Upernavimmi Upernaviullu eqqaani immikkut timmisartuussiniarpoq.
Timmisartortitseqatigiit attaveqaqatigiinnermut naalakkersuisoq ataatsimeeqatigereerlugu taama tusagassiuutinut allapput.
Naalakkersuisoq Martha Lund Olseni Air Greenlandip aqutsisuinik ataatsimeeqateqarumalluni qinnuiginnippoq.
Novembarip ulluisa 21-annili Upernaviup eqqaani timmisartuussineq silamik aamma teknikkimik pissuteqartumik pissusissamisut ingerlasimanngilaq, ippassarlu ilaasussat 94-it ornitassaminnut apuunnissaminnik utaqqipput.
Piffissap ingerlanerani qulimiguulik Uummannameersoq ikiuuppoq, aammalu Qaanaap eqqaaniit qulimiguulik Upernaviliartinniarneqarsimagaluarpoq, tamannali angallavimmi isorartuumi sila pissutigalugu pisinnaasimanngilaq.
Sapaatip akunnerata naanerani immikkut timmisartuussisoqassaaq, pissutsillu immikkut ittut pissutigalugit S61-ip angalatinneqarnissaanik Issittumi Sakkutooqarfik akuerseqqammerpoq.
Air Greenland tusagassiuutinut taama allappoq.