Upernavimmi FIFA Football Festivalertoqarnera iluatsilluartoq

Sungiusaasut Upernavimmeersut nunaqarfinniillu Upernaviup pigisaaneersut pikkorisartinneqarput, pikkorissarnerlu naggaserlugu sungiusaasut Upernavimmi meeqqanut festivalimik pilersaarusiorput, aaqqiissuussipput ingerlatsillutillu.

- Sungiusaasut pineqartut GBU- Coca-Cola fodboldskolemik ingerlatsinissaminnut maanna piareerput - arsanik tujuuluaqqanillu meeqqallu najugaqarfigisaminni isikkamik arsarlutik sammisassaqartinnissaannut atortussanik allanik tunniussisoqareerpoq, Jens Tang Olesen Grønlands Boldspil-Union oqarpoq.

GBU-mi ilitsersuisoq Jakob Ludvigsen Kangaatsiameersoq tallimanngornermit sapaammut pikkorissaallunilu ilitsersuivoq.

Pujorlunilu minilaaraluartoq, meeqqat 30-t FIFA Football Festivalip naggataarnersiorneranut peqataajartorput - tassanilu isikkamik arsaalluni sammissassarpassuit sungiusaasunik aaqqissuunneqarsimasut misilinnissaannut periarfissinneqarput.

Isiginnaariartuttaaq meeqqat eqeersimaartut nuannaartullu, sungiusaasunit tunniusimalluinnartunit aqunneqartut malinnaavigaat - sungiusaasut sammissaqartitsinerup saniatigut meeqqat naatitanik, imermik, arsamik FIFA-meersumik tujuuluaqqamillu meeqqat tuniorarpaat.